شال: پہ زور بیگواھیں مردما نی آجوئی ءَ برجاھیں شدکشیں زھرشانی گدان ءَ 5450 روچ سرجم بوتگ۔ شمبے ءِ روچ ءَ مسودالی ڈومکی، ھاجی گلام ھسین اکلاک ءُ کامران الی کمبرانی ءَ ھوارآ دگہ باز مردم پہ ھمدری درشان کنگ ءَگدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ شھیدانی ھون ءُ زوربیگواھیں مردمانی دیمونیاں رنگ آورتگ ءُ بلوچ راجی زرمبشت میان استمانی ایوانانی تہ ءَ دلگوش دیگ بوگ ءَ اِنت۔ اے نہ تیوک ءَ سوبمندی اِنت بلکیں میان استمان ءِ بلوچستان ءِ باروا دلگوش دیگ ءَ لاچار کنگ اِنت۔
آئی ءَ گوشتگ کہ پہ زور بیگواھیں مردماں جوڑ بوتگیں گل وی بی ایم پی چہ ریاست ءِ درسیں زوراکیاں اَبید بلوچستان ءِ جنگی جاور، ریاستی ادارھانی زوراکی ءُ مردمی ھکانی لگتمالی، بلوچ پسگ سیاسی کارکن، اھوالکار، شائر، نودربر، ڈاکٹر، جنین ءُ زھگانی زوریں بیگواھی ءُ آیانی ژانگولیں لاشانی جنگلاں چگل دیگءِ درسیں گواھاں یکجاہ کنگ ءَ اِنت ءُ بلوچستان ءَ دزمانجنی ءِ لوٹ ءَ کنگ ءَ اِنت۔ ھمے اوست اِنت کہ نوں آدگہ راج بلوچستان ءَ زوراکیانی گر ءُ دار کنگ ءَ گامگیج زور اَنت۔
ماما کدیر گوشتگ کہ 1948 ءَ بگر داں 1977 ءَ ھزارانی کچ ءَ پہ بیگواھیں بلوچانی آجوئی ءَ ایمنیں جھد کنوکانی دارگ ءَ بلوچستان ءَ دست ءُ گوشیں سیاسی باسکانی ھواری ءَ سیاسی رھشون ھم نشانگ کنگ بوتگ اَنت۔ پاکستانی لشکر ءَ ھزارانی کچ ءَ بلوچ آوار جتگ ءُ زور بیگوہ کرتگ اَنت۔ آیانی تہ ءَ زھگ ءُ جنین ھم ھوار اَنت۔ پاکستان ءِ درسیں ادارہ رسانکدر، پارلیمنٹ، لشکر ءُ ادارہ بلوچ راج ءَ دژمن ءِ نگاہ ءَ چار اَنت۔
