بلوچ یکجھتی کمیٹی ( کراچی ) ءِ سروک آمنہ ءَ وتی شنگ کرتگیں درشانے ءَ گوشتگ کہ مکران بس ٹرمینل ءَ پولیس ءِ ناشرکاری مرچیگیں گپے نہ اِنت، اے پولیس ءِ کوھنیں رویشتے ءُایشی ءَ نوں ھلاس بوگ لوٹ ایت۔ مزنیں وھدے بیت کہ پولیس پہ نشہ ءِ پٹ ءُ پول کنگ ءِ نیمون ءَ چہ بلوچستان ءَ آھوکیں مردم نادراھاں ھوار نودربراں ھم دلسیاہ کنگ ءُ آیا نی زراں پلگ ءَ اِنت۔ اے جیڑہ ءَ دراجکشیں وھدے بیت کہ برجاہ اِنت نوں پولیس ءَ سیمسر گواز کرتگ ءُ تچکی ءَ دزی کنگ ءَ اِنت چہ کس ءَ نہ ترس ایت۔
آئی ءَ گوشتگ کہ ما اے جیڑہ ءِ باروا ساری ءَ ھم سرکاری ادارہ سھی کرتگ اَنت، وھدے کہ 65 سالی ئیں کماش ناکو مراد ءِ ویل بوتگ کہ ناکو پہ وتی چمانی درمان کنگ ءَ آتکگ آئی ءَ 55 ھزار ءَ گیش زر گوں بوتگ راہ ءَ پولیس ءَ آئی زر پل اتگ اَنت، گڑا بی وائی سی ( کراچی ) ءِ کلانھیں ھمبلاں اے جیڑہ ءِ باروا پولیس گس ءَ کیس یاداشت کرتگ ءُ کاروائی بندات کرتگ گڑا ناکو مراد ءِ زر دیگ بوتگ اَنت۔ ایش ھم ویلے بوتگ بلے ھمک روچ اے وڑیں باز ویل بوگ ءَ اِنت ایشان ءَ جست گروک نیست۔
آمنہ ءَ وتی درشان ءِ گڈی ءَ گوشتگ کہ ما درسیں تامر کہ آیانی تہ ءَ ساپ کنگ بوگ ءَ اِنت کہ پولیس چون مردماں ترسینگ ءُ آیانی زراں پلگ ءَ اِنت ڈی آئی جی ساؤتھ اسد رزا ءَ کلوہ ءِ ھواری ءَ داتگ اَنت ءُ ما ھمے جھد ءَ کن ایں کہ زوت ڈی آئی جی ساؤتھ دیوان بہ کنت ءُ جیڑہ ءَ گیش ءُ گیوار بہ کنت۔
