لندن: بلوچ ریپبلکن پارٹی ءِ نیمگ ءَ بلوچستان ءَ پاکستانی لشکر ءِ برجاھیں زوراکیانی بگیری ءَ زھرشانی کنگ بوتگ۔ زھرشانی ءِ سروکی بی آر پی ءِ بنجاھی جارکش شیر مھمد ءَ کرتگ ءُ بی آر پی ءِ باسکاں بازیں کچے ءَ بھر زرتگ۔
زھرشانی ءَ شیر مھمد بگٹی ءَ تران کرتگ ءُ گوشتگ بلوچستان ءَ ریاست ءِ زوراکیانی باروا میان استمان ءِ بے تواری یک جستے ودی کنت۔
آئی ءَ گوشتگ کہ سرجمیں بلوچستان ءَ زوریں بیگواھی تیز کنگ بوتگ ، ھزارانی کچ ءَ مردم چیریں آزارجاھانی تہ ءَ آزاراں اوپار کنگ ءَ اِنت۔ دومی نیمگ ءَ زوربیگواھیں مردمانی دروگیں میڑاں کوش برجاہ اِنت۔
