بلوچ راجی زْرمبشت ( بی این ایم ) ءِ زرباری کوریا تک ءَ ماں بوسان ءِ بپ اسکوائر ءَ زھرشانی کرتگ ، آئی ءِ تہ ءَ چہ پاکستانی مھترھند ءِ نیمگ ءَ بلوچ راج ءِ سر ءَ بیوکیں مردمی اگبالانی بے کچیں بگیری گوں ترندی ءَ ایر جنگ بیتگ۔
زھرشانی ءِ میان ءَ ھمود ءِ نندوکیں مردماں پنتاک دیگ بیتگ کہ آیانی سر ءَ بلوچ راج ءِ ناگیگیں جاورانی بارہ ءَ نبشتہ اَت۔آیاں وتی رنج ءُ زھر درشان کنان بلوچستان ءِ سر ءَ بیوکیں زوراکی ایر جتگ اَنت ءُ گوں مردماں تْران کرتگ، آیاں زور بیگواھی ءُ مردمی اگبالانی دگہ بگیریانی ایرجنگ ءَ اوگام جتگ۔
گوں زھرشانی ءَ اتکگیں مردماں گپ جنان بھتاور ءَ وتی گْوشتانک ءَ پاکستان ءِ لشکر ءِ زورگری ءِ بگیری ءَ بلوچ راج ءِ دْراجیں جھد ءِ بارہ ءَ گْوشتگ۔ آئی ءَ کورین زبان ءَ گپ جتگ ءُ بلوچستان ءِ سر ءَ شول کشیں زورگری ءِ نیمگ ءَ دلگوش پرینتگ ءُ گْوشتگ ، ’’ پاکستانی لشکر ءِ ھپتاد ءُ پنچ سال ءَ برجاھیں زورگری ءِ بارہ ءَ ما درس شری ءَ سھی ایں، چہ زورگری ءِ بنداتی روچ ءَ بلوچ راج بدتریں جاورانی دیمپان اِنت۔پاکستانی لشکر ءِ دست ءَ چکچینی پدرد کنوکیں کارے۔بلوچستان ءَ پاکستانی لشکر ءَ جنین ، نودربر ، دانشمند، مھندس ، ڈاکٹر ، سیاسی کارکن ، راھشوناں بہ گر داں شوانگاں ھزاراں بلوچ شھرمنند آوار جتگ ءُ بیگواہ کرتگ۔‘‘
بومی ئیں مردماں بلوچ جیڑہ ءِ سر ءَ بیداری ودی کنگ ءِ لوٹ من اتگ ءُ گوں زھرشانی کنوکاں ھمدردی درشانتگ۔ھپسہ ، سمیر ءُ آگا پیز ءَ بلوچستان ءِ انیگیں جاورانی سر ءَ گپ جتگ ءُ پاکستانی لشکر سکا ایر جتگ کہ ماں بلوچستان ءَ مردمی اگبالانی لگتمالی کنگ ءَ اِنت۔
زھرشانی ءِ آسر ءَ ، بھر زیروکاں بپ اسکوائر ءِ نیمگ ءَ روانکے کش اتگ ءُ بلوچ راج ءِ سر ءَ بیوکیں شول کشیں ناروائیانی سھرا کنگ ءَ اوگام جتگ۔
