تربت: چار روچ پیش چہ جوسک ءَ زورگریں پاکستانی لشکر ءُ چیریں ادارھانی کارمندانی دست ءَ زور بیگواہ کنگ بوتگیں ازیر ءُ شاہ نواز ءِ کھول ءِ نیمگ ءَ ڈی بلوچ ءَ سی پیک دگ ءَ زھرشانی نندانک برجاہ اِنت۔
زھرشانی ءَ جنین ءُ زھگاں ھوار مردماں بازیں کچے ءَبھر زرتگ، دگ ءِ بند بوگ ءِ سوب ءَ دوئیں نیمگاں بازیں کچے ءَ گاڑی اوشتوک اَنت ءُ مساپر سکا جنجالانی دیمپان اَنت۔
آیانی گوشگ اِنت کہ 18 اپریل ءِ شپ ءَ پاکستانی لشکر ءُ چیریں ادارھانی کارمنداں جوسک ءَ بیڑ برتگ ءُ ازیر ءُ شاہ نواز آوار جتگ ءُ گوں وت برتگ اَنت کہ انگت بیگواہ اَنت۔
آیانی گوشگ اِنت کہ چار روچ ءِ گوزگ ءَ پد مارا مئے زور بیگواھیں مردمانی بارو ءَ ھچ وڑیں سرپد دیگ نہ بوتگ کہ چون ءُ کج ءَ اَنت۔ ما پیمشکا لاچار بوتگ ایں ءُزھرشانی کنگ ءَ ایں۔
آیاں گوشتگ کہ ما گوں سرکار ءَ لوٹ کن ایں مئے زور بیگواھیں مردماں زوتاں چہ زوت یل بہ کنت اگاں آیانی سر ءَ چونیں ھم بھتامے ھست گڑا آمیدگس ءَ پیش بہ کنت۔ دانکہ مئے مردم یل کنگ نہ بوتگ اَنت ما وتی زھرشانی ءَ برجاہ دار ایں۔
اھوالکار ءِ رد ءَ زور بیگواھیں ازیر ءُ شاہ نواز ءِ کھول پہ ایپ آئی آر ءَ کنگ ءَ شتگ اَنت بلے آیانی ایپ آئی آر نبیسگ بوتگ۔
