شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5420 روچ سرجم بوتگ۔ آدینگ ءِ روچ ءَ چہ تمپ ءَ سیاسی ءُ چاگردی کارکن بیبرگ، دیدگ، بی ایس او ءِ پیشیگیں سرکماش زبیر، نیشنل پارٹی ءِ سروک ھاجی نیاز، ایڈوکیٹ سدام مینگل، ایڈوکیٹ امین اللہ مگسی ءَ ھوار آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ گوں بلوچ راج ءَ لوٹ کن ایں آ سی ٹی ڈی، ایپ سی ءُ چہ آدگہ ادارھاں ءَ ھچ وڑیں سرپدی مہ دے اَنت اے درسیں ادارہ اے سرپدیاں بلوچ ءِ بگیری ءَ کارمرز کن اَنت ءُ تاوان دے اَنت۔
آئی ءَ گوشتگ کہ ھزارانی کچ ءَ بلوچ پسگانی ژانگولیں لاش دزکپتگ اَنت ءُ ھزارانی کچ ءَ بلوچ زور بیگواہ اِنت۔ بلوچ راج شر زانت کہ مئے دردوار کے اِنت ءُ اے ورنایانی زور بیگواہ ءُ شھید کنوک کے اَنت۔ بلوچ راج شد اوپار کنت بلے چہ وتی دژمن ءَ ھیرات نہ لوٹ ایت۔
ماما کدیر گوشتگ کہ راجی زرمبشت چہ بلوچ پسگانی دیمونیانی آسر ءَ مھکم گوں سوبمندی ءَ دیم ءَ جنزگ ءَ اِنت۔ چہ ایشی ءَ زورگر ترس آماچ اِنت ءُ پر ایمنیں جھد ءِ دارگ ءَ ھر پیمیں زوراکی چکاسگ ءَ اِنت۔
