شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5409 روچ سرجم بوتگ۔ دوشمبے ءِ روچ ءَ بی ایس او پچار ءِ پیشیگیں سرکماش زبیر، ڈاکٹر تارک، ایم جے ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ اکوام متھدہ ءِ مردمی ھکانی نیاد بوتگ پاکستان ءِ بلوچستان ءَ کشگ ءُ چگل دیگ ءِ دارگ ءِ گپ یک نومبر ءَ رسانکدر ءِ سرھال بوتگ۔ اگاں پچار ئے بلوچ ءَ چہ درسیں جنجالاں ابید جھان ءِ دلگوش وتی نیمگ ءَ گور کرتگ۔ سدکاں اے شھیدانی ھون ءُ زور بیگواھیں مردمانی کھولانی ایمنیں جھد ءِ برورد اِنت۔
آئی ءَ گوشتگ کہ مرچی بلوچ ءَ پاکستان ءِ زوراکی پروش داتگ اَنت ءُ جھان ءُ آدگہ راجی دلگوش وتی نیمگ ءَ کرتگ، دومی نیمگ ءَ انچوش گمان بیت کہ تھی دوری ءُ بے بیسھی ھم ھلاس اِنت۔ ما نومبر ءِ ماہ ءَ تیوک ءَ ایشی منانک سرپد بہ ایں۔
ماما کدیر گوشتگ کہ ریاستی ادارھانی دست ءَ آوار جنی ءَ پد زھرشانیانی درچ برجاہ اِنت۔ مردمی ھکانی میان استمانی گل سیر واب اَنت۔ ما گیشتر ھمے گندگ ءَ ایں کہ اگاں چونیں ھندی چاریگی جنگ بیت گڑا ھندی میر ءُ مھتر آئی بے میار پیش کنگ ءِ جھد ءَ کن اَنت۔
آئی ءَ گوشتگ کہ بلوچ ورنایانی لاشانی چگل دیگ، گشندہ ٹولی ءِ رد ءَ ورنایانی نشانگ کنگ، گسانی سر ءَ بیڑ برگ، پہ زور بیگواھیں مردمانی آجوئی ءَ زھرشانی ءَ نشتگیں کھولانی ترسینگ ھمک روچی دودے جوڑ بوتگ۔ انوں بلوچ راج ءِ ھمسنتی ءِ وھد اِنت، اے وھد ءَ گر ءُ چیل بوگ ءِ ھچ وڑیں گنجاھشت پشت نہ کپتگ۔
