بلوچ راجی زرمبشت ( بی این ایم ) ءِ مردمی ھکانی ادارہ پانک ءَ مارچ 2024 ءَ بلوچستان ءَ مردمی ھکانی جاورانی سر ءَ وتی سرجمیں گزارش شنگ کرتگ۔ اے گزارش ءَ زوریں بیگواھی ءُ درکانودی کوش ءِ کچ ءُ کساس، کیچ،گْوادر، جاؤ، سوراب ءُ مستونگ ءَ زوریں بیگواھیانی بگیری ءَ زھرشانی ءُ کراچی ءَ زور بیگواھیں مردمانی درکانودی کوش ءَ ھوار پاکستانی لشکر ءُ چیریں ادارھانی نیمگ ءَ بلوچستان ءَ مردمی ھکانی ناھکیں بگیری پیش کرتگ اَنت۔
پانک ءِ گزارش ءَ گوشگ بوتگ کہ بلوچستان ءَ پاکستانی لشکر ءِ نیمگ ءَ زوریں بیگواھی ءُ درکانودی کوش ءِ ویلانی تہ ءَ گیشی آتکگ کہ سکا ترسناک اِنت۔ مارچ ءِ میان ءَ بلوچستان ءِ چہ جتائیں ھنداں زوریں بیگواھی ءِ 24 کیس سربوتگ، مارچ ءِ میان ءَ 21 زور بیگواھیں مردم چہ آزار جاھاں یل کنگ بوتگ اَنت۔ ھمے ماہ ءَ پاکستانی لشکر ءِ دست ءَ چہ کراچی ءَ دو زور بیگواھیں مردم دروگیں میڑاں کشگ ءُ لاش چگل دیگ بوتگ اَنت۔
گزارش ءَ دیمتر ءَ گوشگ بوتگ کہ بلوچستان ءَ زوریں بیگواھیاں بلوچ چاگرد ءِ تہ ءَ یک نہ کٹوکیں ترس ءُ آزار ءِ دروشم، یک نہ سگوکیں دردے ءِ پیم ءَ برجاہ بوتگ۔ ایشی بگیری ءَ کیچ، گْوادر، جاؤ، سوراب ءُ مستونگ ءَ زوریں بیگواھیانی بگیری ءَ زھرشانی کنگ بوتگ۔ بلے بلوچانی زھرشانی ءُ میان استمانی ادارھانی درشاناں ابید یک کسانیں پرکے گندگ نہ بیت۔ پاکستانی لشکر ھما مردماں کہ آ پہ وتی راج ءِ گھتری ءَ جیڑ اَنت مدام نشانگ کنگ ءَ اِنت۔ زوریں بیگواھی پاکستانی لشکر ءِ بلوچ شھزانتی ءِ بگیری ءَ یک گچینیں سلاھے، چہ ایشی بلکیں آ بلوچ ءِ زانشت ءِ ھلاس کنگ ءَ جوانیں گامگیجے سرپد بیت۔ چنچو ویلانی پژدر ءَ بلوچ راج ءِ ترندیں زھرشانیاں ابید اے شوندات گوستگیں دو دھک اِنت برجاہ اِنت۔ ایشی پارست ءَ زانوگریں بھرگ ءُ نودربر نشانگ بوگ ءَ اَنت۔
گزارش ءَ گوشگ بوتگ کہ مارچ ءِ ماہ ءَ بلوچستان ءِ جتائیں ھنداں زوریں بیگواھیانی بگیری ءَ مردم دگانی سر ءَ درکپتگ ءَ لاچار بوتگ اَنت، چہ ایشاں بلوچستان ءِ ھند سوراب ءَ ابدرزاک ءِ زوریں بیگواھی ءِ بگیری ءَ شھدگ داں 16 اداراں دراجکشیں وھدے ءَ بند بوتگ۔ ھمے وڑ ءَ بلوچستان ءِ تیاب دپی شھر پسنی ءِ ھند کپر ءِ جاہ منند زاکر ء ابدرزاک ءِ پاکستانی لشکر ءِ دست ءَ زوریں بیگواھی ءِ بگیری ءَ کھول ءَ کارواٹ زھرشانی ءَ بند کرتگ۔ ھمے زھرشانی ءَ زور بیگواھیں لالا رپیک ءِ کھول ءَ ھم بھر زرتگ۔ بلوچستان ءِ دمگ کیچ ءِ بنجاھی شھر تربت ءِ ھند آسکانی بازار ءَ پاکستانی لشکر ءِ دست ءَ زور بیگواھیں شھیب اھمد ءُ بالاچ ءِ کھولاں ڈاکی بازار ءِ نزیک ءَ زھرشانی کرتگ ءُ دگ بند کرتگ۔ 8 مارچ ءَ پنجاپ ءِ ھند سرگودھا ءَ وانوکیں جاندراھی تک وانشجاہ ءِ پیتھالوجی لیب سائنسز ءِ نودربر ھدا داد سراج ءِ یل نہ کنگ ءِ بگیری ءَ تُربَت سی پیک کھول ءِ نیمگ ءَ بند کنگ بوتگ۔
بلوچستان ءِ دمگ آواران ءِ ھند جاؤ ءَ پاکستانی لشکر ءِ دست ءَ زور بیگواھیں تاھر ءُ زپر اکبر ءِ کھول ءَ آواران ءُ لسبیلہ ءَ روکیں شھدگ زھرشانی ءَ بند کرتگ۔ 24 مارچ ءَ بلوچستان ءِ دمگ مستونگ ءَ پاکستانی لشکر ءِ دست ءَ زور بیگواھیں امیر ھمزہ ءِ کھول ءَ شال ءُ کراچی ءَ روکیں شھدگ مستونگ ءَ بند کرتگ۔ بلوچستان ءَ ھمک روچ زوریں بیگواھی ءُ درکانودی کوش ءِ جاورانی سر ءَ مردمی ھکانی ادارھانی اے جیڑھانی سر ءَ دلگوش دیگ ھژدری اِنت۔
پانک ءَ وتی گزارش ءَ دیمتر ءَ گوشتگ کہ کراچی ءِ بلوچ آبادی ھند ءَ سنگولین لیاری ءَ 15 ءُ 17 اگست 2023 ءَ پاکستانی لشکر ءِ دست ءَ زور بیگواھیں زمان ء الی نواز ءُ شھیب الی ء گلام الی بابا سند پولیس ءُ لشکر ءَ 27 مارچ 2024 ءَ منگھو پیر ءِ ھند نادرن بائی پاس ءِ نزیک ءَ دروگیں میڑے ءَ درکانودی کشتگ ءُ آیانی لاش چگل داتگ اَنت۔ آ پد ءَ درسرکاری نادراھجاہ ءَ برگ بوتگ اَنت۔ ادارہ پانک ءِ ٹیم ءَ گوں آیانی سیادے ءَ تران کرتگ ءُ آئی گوشتگ کہ یک ھپتگے ءَ پیش سند پولیس اے دوئینانی گساں آتکگ ءُ گوشتگ کہ آئید ءَ پیش شمئے آزیز شمئے کِر ءَ بنت، بلے بدبھتی ءَ اے دوئینانی تیرسپتیں لاش مارا دیگ بوتگ اَنت۔ یات بہ بہ اِت کہ کراچی ءَ بلوچ آبادی ھنداں چہ ایشی پیش باز بلوچ ورنا سند پولیس ءُ رینجر ءِ دست ءَ کشگ بوتگ ءُ باز ورنا دروگیں کیساں بندیگ اِنت۔
گزارش ءِ گڈی ءَ گوشگ بوتگ کہ رسانکدر ءَ ھما ویل کہ دیم ءَ آتکگ اَنت، تیوک ءَ ھما زور بیگواھیں ءُ درکانودی دزگیر کنگ ءَ پد یل بوتگیں مردمانی کچ ءُ کساس گوشتگ اَنت۔ اے کارپدانی آسر ءَ بلوچ چاگرد ءَ زانشت ءُ چاگردی دیمروئی ءَ چونیں تاوان بوتگ پہ آیاں مزنیں پٹ ءُ پولے درکار اِنت۔ ما گندگ ءَ ایں کہ زندگی ءُ اوست ءَ سریچیں ورنا وانگجاہ ءُ شھدگاں دزگیر کنگ ءَ پد زور بیگواہ بوگ ءَ اَنت۔ آ روچاں، ماہ ءُ سالاں زنداناں آزارانی دیمپان بنت۔ ایشانی تہ ءَ یک کچے یل کنگ بیت آ ھم سسائی نادراھی ءِ آماچ اِنت۔ یل بوگ ءَ ابید آیانی مارشت ءِ تہ ءَ پاکستانی لشکر ءُ چیریں ادارھانی سان ھست۔ آ مردم لاچار کنگ بنت کہ زور دری ڈیھاں بہ رو اَنت یا پد ءَ بلوچستان ءَ بلوچ راج ءِ بگیری ءَ پاکستانی لشکر ءِ کمک کنگ ءَ زندگیں لاش بہ بنت یا چہ چاگرد ءَ ڈن بہ بنت۔
