تربت: بلوچ آجوئی لشکر ( بی ایل اے ) مجید برگیڈ ءِ تربت نیول ایئر بیس پی این ایس سدیک ءَ پدائی اُرش ءَ شھید بوتگیں پدائیانی لاشاں سرکار کھول ءَ دیگ ءَ نہ اِنت ءُ ھمے گوشگ ءَ اِنت کہ بلوچ زرمبشت ءِ بگیری ءَ تامربند ءَ بہ گوش اِت کہ شھید بوتگیں سرمچار بیگواھیں مردم اَنت۔
سرکار ءِ اے زوراکیانی پژدر ءَ پدائی شھیدانی کھولاں زھرشانی کنگ ءِ جار جتگ ءُ گوشتگ کہ ما شھیدانی لاشانی نہ دیگ ءِ بگیری ءَ ڈی بلوچ ءَ زھرشانی نندانک ءَ نند ایں۔
ھندی بنشونے ءَ گوں ریڈیو زرمبش ءَ تران کرتگ ءُ گوشتگ کہ شھیدانی کھول پہ لاشانی دزگرگ ءَ نادراھجاہ ءَ شتگ اَنت ءُ گوستگیں چنچو ادار بیت کہ ھمود ءَ ساڑی اَنت۔ سرکار لاشاں دیگ ءَ نہ اِنت کہ کھول وتی تامربندے ءَ ھمے بہ گوش اَنت کہ پی این ایس سدیک ءَ اُرشکار بی ایل اے مجید برگیڈ پدائی زور بیگواھیں مردمانی لڑا ھوار بوتگ اَنت۔ بزاں کہ اے گپانی رد ءَ آ زور بیگواھیں مردمانی کیس ءَ شکی بہ کن اَنت ءُ ھمے پیش بدار اَنت کہ کس بیگواہ نہ اِنت بلکیں اے مردم آجوئی جنگ ءَ ھوار اَنت ءُ ایشاں زور بیگواہ لیکگ ءَ اَنت۔
بنشون ءِ رد ءَ شھیدانی کھولاں سرکار ءِ اے لوٹ رد کرتگ ءُ زھرشانی ءَ ڈی بلوچ ءَ زھرشانی نندانک ءِ جار جتگ۔ شھیدانی کھولانی نیمگ ءَ ڈی بلوچ بند کنگ بوتگ ءُ زھرشانی برجاہ اِنت۔
اے وھد ءَ ڈی بلوچ ءَ شھیدانی کھولانی نیمگ ءَ برجاھیں زھرشانی نندانک ءَ سول سوسائٹی ءِ سروک گلزار دوست ءَ ھوار بلوچ یکجھتی کمیٹی ءِ سروک ءُ آدگہ سیاسی ءُ چاگردی کارکنانی ھواری ءَ مردماں بازیں کچے ءَ بھر زرتگ۔
