ھزدار/ جاؤ/ شال: زورگریں پاکستانی لشکر ءَ دو براتاں ھوار پنچ مردم آوار جتگ ءُ بیگواہ کرتگ۔
اھوالکار ءِ رد ءَ چہ ھزدار ءِ ھند زھری ءَ زور بیگواہ کنگ بوتگیں مردمانی نام میرجان ء سید ھان ءُ ھسین جان ء سیدجان اِنت کہ دوئیں برات اَنت ءُ زھری ءِ جاہ منند اَنت۔ زی آیاں نادراھے پہ درمان کنگ ءَ بازار ءَ آوارتگ کہ پاکستانی لشکر ءُ چیریں ادارھانی کارمنداں آوار جتگ ءُ بیگواہ کرتگ اَنت۔
بنشون ءِ رد ءَ زی آواران ءِ ھند جاؤ ءَ زورگریں پاکستانی لشکر ءَ ڈاکٹر تاھر نامیں ورنایے وتی بنجل ءَ لوٹائینتگ ءُ بیگواہ کرتگ۔
زور بیگواھیں ڈاکٹر تاھر ء مھمد اُمر جاؤ ءِ میتگ ملان ءِ جاہ منند اِنت۔ زی سھب ءَ مھلہ جاؤ تھسیل کیمپ ءِ بنجل ءَ شتگ کہ بیگواہ کنگ بوتگ۔
ھمے وڑ ءَ شال ءَ بابا جان ھوٹل ءَ زورگریں پاکستانی لشکر ءَ دو مردم آوار جتگ ءُ بیگواہ کرتگ۔ زور بیگواہ کنگ بوتگیں مردمانی نام نکیب پشتون ءُ کامریڈ اسمت اِنت کہ آ پی ٹی ایم شال ءُ لورالائی ءِ باسک اَنت ءُ پاکستانی لشکر ءُ چیریں ادراھانی کارمنداں چہ پرنس دگ ءَ بابا جان ھوٹل ءَ آوار جتگ ءُ بیگواہ کرتگ اَنت۔
