شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5387 روچ سرجم بوتگ۔ یک شمبے ءِ روچ ءَ نیشنل پارٹی ءِ نوک گچین بوتگیں ایم پی اے کلسوم نیاز ءَ وتی پارٹی ءِ سروک ڈاکٹر مالک ءِ کلوہ گدان ءَ آرتگ ءُ گدان ءَ نشتگیں مردمانی گون ءَ ھمدردی درشان کرتگ۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ مردمی ھکانی پادمالی برجاہ اِنت، اے درچ ھلاسی ءِ نام ءَ نہ زانت۔ بلوچ پسگ زور بیگواہ کنگ بوگ ءُ آیانی لاش کپگ ءَ اَنت۔ بلوچ آبادیانی سر ءَ اُرش گوں ترندی ءَ برجاہ اِنت۔
ماما کدیر گوشتگ کہ میان استمانی رسانکدر ءُ مردمی ھکانی ادارہ تیوک ءَ اکوام متھدہ ءِ بے تواری گیشتر زوراکیاں کمک کنگ ءَ اِنت ءُ ریاست بے ترس ءَ بلوچستان ءِ کنڈ کنڈ ءَ بلوچ چکچینی کنگ ءُ ناشرکاری کنگ ءَ اِنت۔ گوستگیں دھکانی زوراکی ءِ برجاھیں درچ ءَ ھمک ماہ ءِ وڑ ءَ مارچ ءَ ھم زوراکی گوں ترندی ءَ برجاہ بوتگ اَنت۔ اے میان ءَ کودکیں بلوچ ریاستی ناشرکاری ءِ نشانگ بوگ ءَ اَنت۔ ریاستی ناشرکاریانی ھواری ءَ سرجمیں بلوچستان ءَ بلوچ پسگانی زوریں بیگواھی ءُ ژانگولیں لاشانی چگل دیگ تیز کنگ بوتگ۔
آئی ءَ گوشتگ کہ ھمک روچ بلوچ پسگ زور بیگواہ ءُ شھید کنگ بوگ ءَ اَنت، مردمی ھکانی جاور گنتر بوان اَنت۔ اے جاورانی نوں شر بوگ ءِ ھچ وڑیں گمان نیست۔ پمیشکا کہ میان استمانی ادارہ اکوام متھدہ ءِ ورکنگ رمب ءَ بلوچستان ءَ ترّ ءُ گرد کرتگ ءُ درسیں جاورانی بارو ءَ سرپد اِنت۔ آئی ءَ جاور ناگیگ لیک اتگ اَنت، بلے چہ ایشی ءَ پد سرجمیں بلوچستان ءِ جاور گنتر بوان اَنت۔
