گوادر: زورگریں پاکستانی لشکر ءِ دست ءَ زور بیگواھیں زاکر ءُ لالا رپیک ءِ کھول ءِ نیمگ ءَ نلینٹ کارواٹ ءَ سی پیک دگ ءَ زھرشانی نندانک برجاہ اِنت۔ زھرشانی نندانک ءَ زور بیگواھیں مردمانی کھول، بلوچ یکجھتی کمیٹی ءَ ھوار آدگہ سیاسیءُ چاگردی کارکن ساڑی اَنت۔
کارواٹءَ سی پیک دگ ءِ بند بوگ ءِ سوب ءَ گوادر، تربت ءُ پسنی ءَ گاڑیانی روگ ءُ آھگ مھتل اِنت اے وھد ءَ بازیں کچے ءَ گاڑی اوشتاتگ اَنت ءُ مساپر سکا جنجالانی دیمپان اَنت۔ پہ گپ ءُ تران کنگ ءَ گوادر دمگدار آتکگ بلے آیانی گپ ءُ تران بے سوب بوتگ۔
زھرشانی نندانک ءَ نشتگیں مردمانی گوشگ اِنت کہ مئے لوٹ چہ سرکار ءَ ھمیش اِنت مئے زور بیگواھیں مردماں آجو بہ کنت۔ مارا اد ءَ واکدار بس دروگیں دلبڈی دیگ ءَ اَنت کہ دگ ءَ پچ بہ کن اِت ما شمئے مردماں آجو کنائین ایں، مئے گوشگ ھمیش اِنت دانکہ مئے مردم آجو کنگ نہ بوتگ اَنت ما وتی زھرشانی ءَ برجاہ دار ایں۔
آیاں گوشتگ کہ مئے پیرزالیں مات اد ءَ دگانی سرءَ کپتگ اَنت ما دگہ چیزے لوٹ ءَ نہ یتکگیں مئے لوٹ بس ھمے یکیں اِنت اگاں مئے مردمانی سر ءَ چونیں بھتام ھست گڑا آمیدگس ءَ پیش کنگ ءُ پولیس ءِ دست ءَ دیگ بہ بنت آیانی میارباری ھم مارا گوشگ بہ بیت۔
