نیشنل ڈیموکریٹک پارٹی ءِ بنجاھی جارکش ءَ وتی شنگ کرتگیں درشانے ءَ گوشتگ کہ دہ روچ ءَ گیش گوزگ ءَ پد گوادر ءِمردمانی زندماں انگت ءَ جنجالانی دیمپان اِنت۔ سی پیک ءِ بنجاہ، ڈیپ سی پورٹ ءِ واھند ریاست ءِ تالہ ءِ مٹ کنوکیں گوادر مرچی تباہ اِنت۔ اے ھورانی میان ءَ سدانی کچ ءَ گس آپ ءِ تہ ءَ بڈا تگ ءُ لمب اتگ اَنت واکدار آیانی کمک ءَ بے سوب بوتگ ۔ سدانی کچ ءَ یکدار تباہ بوتگ اَنت، پہ گوادر ءِ جان ءُ مال ءِ تاوان ءِ بارو ءَ گمان کنگ نہ بیت۔
جارکش ءَ دیمتر ءَ گوشتگ کہ اے میان ءَ ابید اکس کشی ءَ سرکار ءِ نیمگ ءَ انگت ءَ دگہ ھچ وڑیں کار گندگ نہ بیت۔ بلکیں مردم وتی کمک ءَ وت اے تباھی ءِ گون ءَ مڑگ ءَ اَنت۔ پاکستان ءُ بلوچستان سرکار ، بلوچستان ءِ مادنانی لٹ ءُ پل کنوکیں آدگہ ادارھانی ھواری ءَ جی ڈی اے جیڈا ، گوادر پورٹ ءَ ھوار گوادرءَ اربانی کچ ءَ باپاری ءِ ٹاپار جنوک اے تباہ آماچیں مردمانی نیمگ ءَ دلگوش نہ دیگ ءَ ھمے گپ پدر بیت کہ آیان ءَ گوں گوادر ءِ مردماں ھچ ھمدردی نیست، آیانی مول تیوک ءَ چہ گوادر ءَ نپ چست کنگ اِنت۔
جارکش ءَ گوشتگ کہ مردمانی نیمگ ءَ کمکی پرکاریانی کمک کنگ ءُ جتائیں کمکی گدانانی ریاستی ادارھانی نیمگ ءَ آیانی دارگ ءِ جھد بوگ ءَ اِنت۔ زی گوادر ءَ کمکی گدان ءِ سر ءَ ارش کنگ بوتگ، مرچی ھب ءَ کمکی گدان ءَ پولیس،اے ٹی ایپ ءُ چیریں ادارھانی نیمگ ءَ دور کنگ ءُ کمکی کاراں ھواریں نودربرانی ترسینگ ءَ گون ترندیں دانکان ایر جن ایں۔
