پنجگور: ھدا بادان ءُ مواچ بازار ءِ دکانداراں دُزی، لُٹ ءُ پلی ءِ گیش بوگ ءِ بگیری ءَ پَنجگُور ءِ بازار ءَ زھرشانی کرتگ۔ زھرشانی ءَ دکاندار، سیاسی ءُ چاگردی کارکن، لس مردماں بازیں کچے ءَ بھر زرتگ۔
زھرشانی کنوکیں مردمانی گوشگ اِنت کہ مواچ بازار ءُ ھدابادان ءَ دزی، لٹ ءُ پل ءُ آدگہ میاباریانی بگیری ءَ پولیس ءُ لیویز ءِ ھواریں پانگساں 48 ادار ءِ وھد داتگ مرچی کہ آ وھد ھلاس بوتگ گڑا ما دکاندار ءُ آدگہ شھریانی ھواری ءَ دیوانے برجم داشتگ۔
زھرشانی کنوکیں مردمانی گوشگ اِنت کہ برجاھیں دیوان ءَ ھمے سوڑگ بوتگ کہ پولیس ءُ واکدار ءَ دگہ دہ روچ ءِ وھد ءَ دے ایں اگاں داں دہ روچانی تہ ءَ جیڑہ گیش ءُ گیوار کنگ نہ بوتگ اَنت ءُ دگہ پہ پانگس جنگ نہ بوت گڑا دمگدار ءُ ڈی پی او ءِ کارگس ءِ دیم ءَ زھرشانی کن ایں۔
آیاں گوشتگ کہ مکران دمگدار ءَ مواچ بازار ءَ پولیس ءُ لیویز ءِ ھواریں پانگس ءِ جنگ ءِ جار جتگ ءُ ایشی نبشتھی منانک ھم مئےگور ءَ ھست، بلے چہ ایشی ءَ ابید واکدار ءُ پولیس ءَ وتی کول پیلو نہ کرتگ اَنت۔
ھندی مردماں لوٹ کرتگ کہ واکدار شھریانی پریاتاں گوش بدار ایت ءُ مئے لوٹانی سر ءَ زوت گامگیج بہ زور ایت اگاں نہ ھداباد ءِ مردم پہ وتی ھکی ئیں لوٹاں ترندیں زھرشانی کنگ ءَ لاچار بنت۔
