گریشگ: سمرینہ ءِ مات بسران ءَ مھمد یونس ءُ سمرینہ ءِ نیمگ ءَ کرتگیں پریس کانپریس ءِ پژدر ءَ گوشتگ کہ منی زھگ پہ زور گپ کنگ ءَ لاچار کرتگ۔ منی زھگ نبشتہ کرتگیں گپاں ھم ونت کنگ ءَ نہ اِنت۔ یک کسانیں زھگے ءِ پہ زور گپ پرماھگ ءَ ھچ وڑیں کانودی بستار نیست۔
آئی ءَ گوشتگ کہ ڈیھ ءِ کانود ءِ رد ءَ منی زھگ ءَ چہ میاربار ءَ آجو بہ کن اَنت، من ءَ گوں زھگ ءَ ایمنیں جاھے ءَ گپ کنگ ءِ موکل دیگ بہ بیت۔ دومی گپ ایش اِنت کہ منی زھگ ءَ انگت ءَ میٹرک ھم نہ کرتگ ءُ آ انگت ءَ سریج ءِ وانگجاہ ءَ وانگ ءَ بوتگ۔
بسران ءَ گوشتگ کہ اگاں میاربار ھمے ٹاپار ءَ جنگ ءَ اِنت من ءَ ڈگارانی لالچ اِنت، گڑا من یونس ءِ برزاتک چی ءَ سانگ کرتگ، اگاں من یونس ءِ کھول ءَ وتی زھگ ءِ دیگ ءَ رازیگ بوتگ آں اود ءَ من ءَ چے رسگی بوتگ؟ یونس ءِ درسیں گپ کینگداری ءُ دروگ اَنت۔ راج کانودی جنگ ءَ منی کمک ءَ بہ کنت۔
