شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5358 روچ سرجم بوتگ، پنچ شمبے ءِ روچ ءَ پشتونکواہ میپ ءِ سروک نزیر اچکزئی ءَ ھوار آدگہ سیاسی ءُ چاگردی کارکن جاوید، اشرپ، اسمان بڑیچ، یونس ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستانی ادارھانی رستری زوراکیاں ابید بلوچ پسگ راجی زرمبشت ءَ ھوار بوان اَنت ءُ راجی زرمبشت ءِ تہ ءَ جوانیں کردے پیلو کنگ ءَ اَنت۔ بلوچ راجی زرمبشت ءِ مھکمی ءَ ریاست ھیران کرتگ۔
آئی گوشتگ کہ بلوچستان ءَ ریاست ءِ زوراکی ءُ مردمی ھکانی لپاشگ ءِ بگیری ءَ میان اسمان ءَ جست گرگ بندات کرتگ، برتانیہ پارلیمنٹ ءِ باسکاں ویسٹ منسٹر ھال ءَ بلوچ ء جیڑہ ءُ بلوچستان ءَ ریاست ءِ زوراکیانی بگیری ءَ گوستگیں روچاں باوست کرتگ سکا جوانیں گامگیجے ما ایشی ءَ ساڑائیں۔
ماماکدیر دیمتر ءَ تران گوشتگ کہ جھان نوں زانگ ءَ اِنت پہ زرباری ایشا ءِ ایمنی ءَ بلوچ ءِ جیڑہ ءِ گیش ءُ گیوار کنگ ھژدری اِنت۔میان استمان ءَ پہ بلوچ ءِ جیڑہ ءِ گیش ءُ گیوار کنگ ءَ وتی کرد پیلو کنگ لوٹ ایت۔ بلوچستان ءَ ریاست ءِ زوراکیانی زانگ ءُ پہ آیانی دارگ ءَ اکوام متھدہ ءَ مشن دیم دیگ لوٹ ایت ءُ جاور چارگ ءُ پاکستان جست گرگ لوٹ ایت۔
