سند: سندی راجدوستیں سروک وائس پار مسنگ پرسن آپ سند ءِ سروک سسی ءُ سورٹ لوھار ءِ پت ھدایت لوھار ءِ ریاست ءِ کوش ءِ بگیری ءَ زھرشانی نندانک پنچ روچ ءَ برجاہ بوگ ءَ پد دوشی پریس کانپریس ءَ پد آسر کنگ بوتگ۔
پریس کانپریس ءَ سورٹ لوھار ءُ سسی لوھار ءَ تران کرتگ ءُ گوشتگ کہ ما پہ وتی پت ءِ کوش ءِ بگیری ءَ آمیدگس ءَ پٹیشنے داتگ کانود ءِ پارست ءَ کیس کنگ ءِ جھد کرتگ بلے نوں چہ پاکستان ءِ آمیدگس ءَ مارا انساپ ءِ ھچ وڑیں اوست نیست، مئے انساپ جاہ مئے سندی راج اِنت۔ نوں ما وتی پریاد ءَ وتی راج ءِ کر ءَ برگ ءَ ایں، اے جھد ءِدومی بھر ءَ مرچی تیوگیں سند ءَ زھرشانی روانک کشگ ءِ جار ءَ جن ایں۔
آئی ءَ گوشتگ کہ جھد ءِ سیمی بھر ءَ ما سند ءَ یک مزنیں زھرشانی یے ءِ جار ءَ جن ایں، مئے اے جھد تیوک ءَ پہ مئے پت ءِ ریاست ءِ کوشءِ بگیریءَ نہ بلکیں پہ سند ءِ ھما درسیں نزوریں مردمانی ناھکیں ریاست ءِ کوش، زوریں بیگواھیءُ زوراکیانی بگیری ءَ برجاہ بیت، دانکہ ھما وھد ءَ زورگریں پاکستان ریاست مئے سرڈگار ءِ سر ءَ وتی لشکری زورگپتی ءُ توپک ءِ زور ءِ سر ءَ مئے مردمانی گون ءَ وتی زوراکیاں برجاہ دار ایت۔
آئی ءَ گوشتگ کہ پاکستانی لشکر ءَ مئے پت ھدایت لوھار ءَ پہ سند ءِآجوئی جھد ءَ شھید کرتگ۔ شھیدھدایت لوھار ءَ ھوار سند ءِ درسیں شھیدانی بیر آجوئی ءِ دروشم ءَ گرگ بنت۔ جھد برجاہ بیت۔
