گریشگ: گوستگیں روچاں ھزدار ءِ ھند گریشگ ءَ یونس نامیں ماسٹرے ءَ وتی برازتک ءِ دشتار ءُ جنوزامیں بسران ءِ کسان سالیں جنک آوار جتگ ءُ تربت ءَ برتگ پہ زور نکاہ کرتگ۔
بنشون ءِ رد ءَ مرچی آوار جنگ بوتگیں جنک ءِ مات بسران ءُ آئی ناکو مھمد آلم نال پولیس گس ءَ شتگ اَنت ءُ آیاں ایپ آئی آر کرتگ ءُ ھزدار پریس کلب ءَ پریس کانپریس ھم کرتگ۔
سانمدیں کھول ءِ گوشگ اِنت ما پہ پریس کانپریس ءَ ھزدار پریس کلب ءَ شتگیں مارا پریس کلب ءِ کلانھیں اھوالکار ءَ گوشتگ کہ اے وڑیں مزنیں جیڑھے ءِ بارو ءَ شما پرچا دیر کرتگ، آیاں مئے گون ءَ کمک کرتگ۔
پریس کانپریس کنگ ءَ پد ھزدار پریس کلب ءِ پیسبک ءَ پریس کانپریس کور کنگ بوتگ۔
ریڈیو زرمبش ءِ سربوتگیں ھالانی رد ءَ جنک ءِ آوار جنوکیں مردم زوراکیں مردم اَنت ءُ آیان ءَ سرکاری کمکارانی پلہ مرزی گون اِنت ءُ سانمدیں کھول سکا نزورءُ تنگدستیں مردم اَنت۔
آئی گوشگ اِنت کہ پہ زور ھزدار پریس کلب ءِ پریس کانپریس کور کناھینگ بوتگ۔
اے درگت ءَ جنک ءِ مات بسران ءَ وتی تامربندے ءَ گوشتگ کہ منی جنک ءِ اُمر چاردہ سال اِنت، منی جنک یونس ءِ برازتک ءِ نام ءَ کنگ بوتگ۔ منی جنک منی جست گرگ ءَ اَبید برگ ءُ نکاہ کنگ بوتگ۔
بسران ءِ گوشگ اِنت کہ من ءَ یونس گوشتگ کہ من تئی جنک ءُ آئی دشتار کہ یونس ءِ برازتک اِنت من دوئیں زھگانی پت آں، من ھمے گپ ءَ دلجم بوتگ آں۔
بسران ءَ گوشتگ کہ من ھمے گپ ءَ رد کپتگاں ءُ وتی زھگ وانگ ءِ نام ءَ گوں یونس ءَ دیم داتگ، آئی گوں منی کودکیں جنک ءَ پہ زور نکاہ کرتگ۔
