برلن: بلوچ ریپبلکن پارٹی ( بی آر پی ) ءَ بلوچستان ءَ پاکستانی لشکر ءِ زوراکیانی بگیری ءَ ماں جرمنی ءِ شھر برلن ءَ زھرشانی کرتگ۔
آیاں تران کرتگ ءُ گوشتگ کہ بلوچستان ءَ برجاھیں لشکرکشی، زوریں بیگواھی ءُ دروگیں میڑاں بلوچ ورنایانی ناھکیں کوش گوں ترندی ءَ برجاہ اِنت۔ آیاں گوشتگ کہ ڈیرہ بگٹی ءَ گوستگیں ماھے ءَ گیش اِنت لشکرکشی برجاہ اِنت۔
اے لشکرکشی ءَ داں انوں سی ءَ مردم ءَ گیش زور بیگواہ کنگ بیتگ کہ انگت ءَ پاکستانی لشکر ءِ چیریں آزارجاھاں بندیگ اَنت۔ آیاں گوشتگ کہ گوستگیں روچاں دو ورنا وتگڑیں سی ٹی ڈی کہ آ انوں آئی ایس آئی ءِ جھلی ونگ اِنت آئی دروگیں میڑاں شھید کرتگ اَنت کہ گوستگیں چنچو ماہ اِنت بیگواہ کنگ بیتگ اَنت۔
آیانی کیس بیگواھیں مردمانی گل ءِ کِر ءَ یاداشت کنگ بیتگ اَنت۔ بی آر پی ءِ کارکناں گوں مردمی ھکانی ادارھاں لوٹ کرتگ کہ بلوچستان ءَ برجاھیں ریاستی ناشرکاریانی بگیری ءَ توار چست بہ کن اَنت۔
بنشون: اھوالکار / اکس: اھوالکار
