سنھا: یمن ءِ بنجاھی شھر سنھا ءَ کمکی سامانانی بھر ءُ بانگ کنگ ءِ وھد ءَ میڑے ءَ جنین ءُ زھگانی ھواری ءَ ھشتاد ءُ پنچ مردم بیران ءُ باز مردم زدگ بیتگ۔
جھانی رسانکدر ءِ رد ءَ سنھا ءِ یک وانگجاھے ءَ پہ نیزگاریں مردماں کمکی سامانانی بھر ءُ بانگ کنگ ءِ وھد ءَ میڑے برجاہ بیتگ، کم چہ کم ھشتاد ءُ پنچ مردم بیران ءُ سدانی کَچ ءَ مردم زدگ بیتگ اَنت۔
یمن ءِ سرکار ءَ اے گپ راست کرتگ ءُ گوشتگ کہ میڑ ءِ آسر ءَ سیئسد ءُ بیست ءُ دو مردم زدگ بیتگ اَنت۔ بیران ءُ زدگ بیتگیں مردمانی تہ ءَ جنین ءُ زھگ ھم ھوار اَنت۔
چہ زدگ بیتگیں مردماں بازیں مردمانی جاور ناگیگ اَنت۔ ترس ھست کہ بیران بیتگیں مردمانی کَچ گیشتر بہ بیت۔ بلے ھمے جاہ ءَ کمکی سامانانی بھر ءُ بانگ کنگ ءِ کار انگت ءَ برجاہ اِنت۔
بنشون: جھانی رسانکدر | اکس: دامگ
