ھاران: زورگریں پاکستانی لشکر ءَ زی کماشیں مردمے ءَ ھوار سے مردم آوار جتگ ءُ بیگواہ کرتگ۔
اھوالکار ءِ رد ءَ پاکستانی لشکر ءَ ھاران ءِ نامداریں ھجام کماش گل ھان شکاری، آئی زھگ میران ءُ زاھد ء مھمد اکتر نامیں مردمے آوار جتگ ءُ بیگواہ کرتگ۔ اے مردم زورگریں پاکستانی لشکر ءَ زی چہ گس ءَ آوار جتگ ءُ بیگواہ کرتگ اَنت کہ انگت ءَ آیانی ھچ وڑیں ھال نیست۔
کماش گل ھان شکاری ءِ بارو ءَ گوشگ بوگ ءَ چہ ایشی پیش پاکستانی لشکر ءَ آئی دو زھگ ءُ یک نماسگے آوار جتگ ءُ بیگواہ کرتگ رند ءَ سی ٹی ڈی ءِ دست ءَ داتگ اَنت کہ پد ءَ یل کنگ بوتگ اَنت۔
بنشون ءِ رد ءَ چہ ایشاں ابید گل ھان شکاری ءِ یک زھگے نواب امران ءُ گھارزتک نجیب ملائی پاکستانی لشکر ءَ آوار جتگ ءُ بیگواہ کرتگ اَنت کہ انگت بیگواہ اَنت۔
یات بہ بہ اِت کہ گل ھان شکاری بلوچ یکجھتی کمیٹی ءِ نیمگ ءَ اسلام آباد پریس کلب ءِ دیم ءَ برجاھیں زھرشانی نندانک ءَ بھرتگ اَت ءُ پہ وتی زور بیگواھیں مردمانی آجوئی ءَ لوٹ کرتگ اَت۔
