شال: بیگواھیں بلوچانی توار ( وی بی ایم پی ) ءِ سرکماش نسر اللہ ءَ ماں رسانکدر ءَ وتی شنگ کرتگیں درشانے ءَ گوشتگ کہ چہ تربت ءِ جتائیں ھنداں زور بیگواہ کنگ بوتگیں آبد الی، زریپ، شئیب، ھماد نزیر ءُ آدل اکبال ءِ کھول پہ وتی آزیزانی آجوئی ءَ سی پیک ایم ایٹ ڈی چاراہ ءَ زھرشانی نندانک ءَ نشتگ اَنت۔
نسر اللہ ءَ گوں سرکار ءَ لوٹ کرتگ کہ تربت ءَ زھرشانی نندانک ءَ نشتگیں زور بیگواھیں مردمانی کھول ءِ نیمگ ءَ برجاھیں زھرشانی ءَ دلگوش ءَ گور بہ کنت۔ اگاں تربت ءَ زور بیگواھیں مردمانی سر ءَ چونیں بھتام ھست گڑا آیاں دیم ءَ بیار ءُ آمیدگس ءَ پیش بہ کنت، اگاں آ بے میار اَنت گڑا زوت یل کنگ بہ بنت ءُ آیانی کھول چہ آزاراں آجو کنگ بہ بنت۔
یات بہ بہ اِت کہ آبد الی ء وژدل جھمنند آپسر 21 مارچ 2023، زریپ ء مھم بکش 9 اگست 2023 ، شئیب ء لیاکت 10 اپریل 2023، ھماد نزیر ء نزیر اھمد 10 اپریل 2023 ءُ آدیل اکبال ء مھمد اکبال ءَ 8 مارچ 2023 ءَ پاکستانی لشکر ءَ آوار جتگ ءُ بیگواہ کرتگ۔
