بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ تربت ڈی بلوچ ءَ زور بیگواھیں مردمانی زھرشانی نندانک ءِ پلہ مرزی ءَ کن ایں ءُ گوں مردماں بھر زورگ ءِ لوٹ ءَ کن ایں۔ دانکہ بلوچستان ءَ ریاست ءِ ناشرکاری، زوریں بیگواھی، کشت ءُ کوش ءُ رستری کاروائی ھلاس نہ بوتگ اَنت بلوچ راج وتی گھَگیری ءَ برجاہ دار ایت۔
آئی ءَ گوشتگ کہ چہ مردماں ھمے اوست ءَ دار ایں کہ آ نوں پہ وتی آزیزانی زوریں بیگواھی ءَ بے توار بوگ ءَ ابید چہ گساں درکپ اَنت ءُ دگانی سر ءَ رو اَنت ریاستی ادارھاں ھوار جھان ءَ را ھمے پیش دار اَنت کہ ریاست بلوچستان ءَ چون چونیں رستری ءُ درکانودی کار کنگ ءَ اِنت۔
آئی گوشتگ کہ اے وھد ءَ ڈی بلوچ ءَ شش زوربیگواھیں مردمانی کھول ساڑی اِنت، بلے چہ کیچ ءَ آدگہ زور بیگواھیں مردمانی کھول کم کم ءَ ھوار بوگ ءَ اَنت۔ ریاست ءِ گون ءَ دیم پہ دیمی تیوک ءَ گوں لّس مردمی گھگیری ءَ کنگ بیت۔
