آواران: تیرتیج مزاری میتگ ءَ وانگجاہ ءَ ٹیچرانی ساڑی نہ بوگ ءَ سوب ءَ نودربراں زھرشانی ءَ آواران تربت دگ بند کرتگ۔ دگ ءِ بند بوگ ءِ سوب ءَ مردم سکا جنجال بوتگ اَنت۔
زھرشانی ءَ نودربرانی ھواری ءَ جنین ءُ لس مردماں بھر زرتگ۔ نودربراں ھندی واکدار ءُ بلوچستان ءِ پیشگیں وتگڑیں مزن وزیر کدوس بزنجو ءِ بگیری ءَ اوگام جتگ۔
آیاں تران کرتگ ءُ گوشتگ کہ آواران چہ مردمی بنکی ھکاں زبھر اِنت۔ چہ آدگہ آسراتیاں ابید بازیں جاہ ءَ وانگ نیست اگاں کج ءَ کہ وانگجاہ بندگ بوتگ انت گڑا اود ءَ ٹیچر ساڑی نہ اَنت۔
آیانی گوشگ اِنت کہ چہ ٹیچرانی ساڑی نہ بوگ ءِ سوب ءَ زھگانی زندمان زوال بوگ ءَ اِنت۔ سرکار وانگجاہ ءِ ٹیچرانی ساڑی نہ بوگ ءِ درگت ءَ دلگوش بہ کنت ءُ ٹیچرانی بگیری ءَ کاروائی کنگ بہ بیت۔
