اکوام متھدہ ءِ انسانی ھکانی کونسل ءِ شست ءُ یکمی دیوان ءَ بلوچ یکجھتی کمیٹی ءِ سروک ڈاکٹر سبیہ بلوچ ءَ تران کرتگ ءُ بلوچستان ءَ انسانی ھکانی لگتمالی پیش کرتگ اَنت ءُ چہ میان استمانی تک ءَ زوتیں دلگوش دیگ ءِ لوٹ کرتگ۔
آئی ءَ گوشتگ کہ بلوچستان زمینی کچ ءُ کساس ءَ چہ پاکستان ءِ درستاں مستریں استان اِنت، چہ دھکاں انسانی ھکانی لگتمالی بوگ ءَ اِنت۔ زوریں بیگواھیانی درچ یک پالیسی یے ءِ رد ءَ برجاہ اِنت، اود ءَ ھمک روچ بلوچ ورنا، نودربر، سیاسی کارکن ءُ لس شھری آوار جنگ ءُ بیگواہ کنگ بوگ ءَ اَنت۔
ڈاکٹر سبیہ ءَ گوشتگ کہ زور بیگواھیں مردمانی کھول چہ سالاں پہ وتی ازیزانی آجوئی ءَ زھرشانی کنگ ءَ اَنت، بلے آیاں انساپ رسگ ءَ نہ اِنت۔کشگ ءُ چگل دیگ ءِ پالیسی ءِ رد ءَ بازیں مردمانی چہ جتائیں ھنداں لاش دزکپتگ اَنت۔
آئی ءَ گوشتگ کہ کجام ھم مردم زوراکیانی بگیری ءَ توار چست کنت آ ریاستی زوراکیانی آماچ بیت۔ اھوالکار، وکیل، نودربر ءُ انسانی ھکانی کارکن ھم ترسینگ ءُ دزگیر کنگ بوگ ءَ اَنت ءُ ناشرکاری ءِ گِر ءُ داریں کانود ءِ رد ءَ بندیگ کنگ بوگ ءَ اَنت۔
بی وائی سی ءِ سروک ءَ گوشتگ کہ ڈاکٹر ماہ رنگ ءَ ھوار آدگہ سروکاں سالے ءَ گیش اِنت کہ پہ پر ایمنیں زھرشانی ءُ زور بیگواھیں مردماں انساپ ءِ لوٹ ءَ بندیگ اَنت۔
ڈاکٹر سبیہ بلوچ ءَ گوں اکوام متھدہ ءُ میان استمانی انسانی ھکانی گلاں لوٹ کرتگ کہ بلوچستان ءَ زوریں بیگواھی درکانودی کوش ءُ سیاسی کارکنانی بگیری ءَ کاروائیانی بابت ءَ زوت پٹ ءُ پول بہ کن اَنت۔
آئی ءَ گڈسر ءَ گوشتگ کہ اگاں پہ بلوچستان ءِ جاورانی بابت ءَ زات دلگوش دیگ نہ بوت گڑا جاور گنتر بنت۔ ایشی سان تھنا بلوچستان ءَ نہ بلکیں سرجمیں دمگ ءِ سر ءَ کپ اَنت۔
بنشون: درشان اکس: اسکرین شارٹ
