شال: پہ زوربیگواھیں مردمانی آجوئی ءَ توار چست کنوکیں گل وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6119 روچ سرجم بوتگ کہ شال پریس کلب ءِ دیم ءَ برجاہ بوتگ۔
اے درگت ءَ 26 پروری ءَ چہ شال ءَ بولان میڈیکل کالونی بروری دگ ءَ زوربیگواہ کرتگیں زاکر تاج ءِ لوگبانک آسیہ بلوچ زھرشانی گدان ءَ آتکگ ءُ وتی لوگواجہ ءِ بیگواھی کیس یاداشت کرتگ۔
آئی گوشتگ کہ زاکر تاج ء تاج مھمد ءَ 26 پروری ءِ شپ ءِ ادار دوازدہ ءِ نزیک ءَ پاکستانی پوج، سی ٹی ڈی ءِ کارمنداں آوار جتگ ءُ بیگواہ کرتگ۔ آ انگت آمیدگس ءَ پیش کنگ نہ بوتگ ءُ آئی بابت ءَ مارا سرپدی دیگ ءَ نہ اَنت۔ چہ ایشی ءَ مئے کھول جنجالانی دیمپان اِنت۔
وی بی ایم پی ءَ گوشتگ کہ آسیہ بلوچ دلجمی داتگ کہ زاکر تاج ءِ کیس ءَ سرکاری کمیشن ءُ دمگی سرکار ءَ سر کنت ءُ پہ آئی آجوئی ءَ ھمک جاہ ءَ توار چست کنگ بیت۔
وی بی ایم پی ءِ چیرمین نسراللہ بلوچ ءَ گوں سرکار ءُ سرکاری ادارھانی سروکاں لوٹ کرتگ کہ پہ زاکر تاج ءِ آجوئی ءَ زوت دلجمی بہ دنت۔ اگاں آئی سر ءَ چونیں ھم بھتامے ھست آ دیم ءَ آرگ ءُ آمیدگس ءَ پیش کنگ بہ بیت دانکہ آئی کھول چہ اے جنجالاں بہ رک ایت۔
بنشون: درشان اکس: وی بی ایم پی
