جینوا ءَ اکوام متھدہ ءِ انسانی ھکانی کونسل ءِ دیوانءَ بی این ایم ءِ زھرشانی ءِ میانءَ بلوچ نیشنل موومنٹ ءِ دری کارانی تک ءِ کارگشاد پھیم بلوچ ءَ گوں زرمبش ٹی وی ءِ اھوالکار اھمد بلوچ ءَ وتی گلگدارے ءَ گوشتگ کہ بلوچ راجءُ جھان ءِ نزوریں راجاں یک انچیں پلیٹ پارمے درکار اِنت کہ تو اود ءَ گپ جن ئے گڑا سرجمیں جھان تئی گپاں گوش بدار ایت۔ اکوام متھدہ ءِ اے کہ انسانی ھکانی کونسل ءِ پروگرام اَنت اود ءَ تو وتی گپاں ایر کن ئے گڑا جھان تئی گپاں دلگوش کنت۔ چوشیں پلیٹ پارمے رس ایت گڑا تو اود ءَ وتی ڈیھ ءَ بیوکیں زواکی، زورگپتی ءُ انسانی ھکانی لگمالیاں دیمءَآرت کن ئے۔
آئی ءَ گوشتگ کہ ساری ءَ آدگہ مردم یا آدگہ پارٹیانی باسک یک کسانیں کچے ءَ اتکگ اَنت، نوں شما گندگ ءَ اِنت کہ بلوچ ءِ توارجھانءِ جتائیں پورماں گوش دارگ بوگ ءَ اِنت۔ میان استمانی ادارہ اَنت، مسال کہ اکوام متھدہ ءِ ورکنگ گروپ اَنت ما زی آگوں آیاں گند ءُ نند کرتگ۔آ نوں وت مارا وھد دیگ ءَ اَنت ءُ آیانی مردم مارا گوشگ ءَ اَنت کہ شما کجام وھد ءَ وھد رس ایت گڑا شما مئے گونءَ رھوت بہ کن اِت ءُ مارا بلوچستانءِ جاورانی بابتءَ سرپدی بہ دے اِت۔
پھیم بلوچ ءَ گوشتگ کہ چہ ایشی پیش ھچ نہ بوتگ بزاں اکوام متھدہ ءِ گروپاں بلوچستانءِ جیڑہ دیمءَ آرتگ، نوں منءَ انچوش گمان بوگءَ اِنت کہ اے بی این ایم ءِ سنگتانی جھد اِنت کہ میان استمانی ادارہ مارا گوش دارگ ءَ اَنت، ءُ جھانءِ ادارہ بلوچستانءَ بیوکیں زوراکیانی بگیری ءَ توار چست کنگ ءَ اَنت۔
آئیءَگوشتگ کہ زی ڈاکٹر نسیم بلوچ ءَ جھانءِ مستریں پلیٹ پارمءَ وتی گپ ایر کرتگ اَنت کہ بلوچستان ءِ جیڑہ تھنا انسانی ھکانی لگتمالیانی نہ اِنت بلوچستان ءِ جیڑہ زوریں کبزہ ءُ زوراکی ءِ جیڑہ اِنت۔ نوں پائدگ ھمیش اِنت کہ جھان ترا گوش دارگ ءَ اِنت ءُ تئی گپ چہ ھمک ڈیھ ءِ جھگیرانی رد ءَ داں ھما ڈیھاں سر بوگ ءَ اِنت۔
بنشون: زرمبش ٹی وی گلگدار اکس: زرمبش ٹی وی
