جنیوا ءَ اکوام متھدہ ءِ انسانی ھکانی کونسل ءِ شست ءُ یکمی دیوان ءَ پاکستان ءَ انسانی ھکانی جاورانی سر ءَ 25 مارچ 2026 ءَ یک پروگرامے برجم دارگ بوتگ، اے پرواگرام ءَ جتائیں میان استمانی مردم، سیاستدان ءُ انسانی ھکانی کارکناں بھر زرتگ۔ اود ءَ پاکستان ءِ جی ایس پی پلس ءُ انسانی ھکانی پابندیانی سر ءَ دلگوش گور کنگ بوتگ۔
اے پروگرام ءَ یورپی پارلیمنٹ ءِ باسک باربرا بونٹی، بلوچ نیشنل موومنٹ ءِ چیئرمین ڈاکٹر نسیم بلوچ، برتانیہ ءِ جاہ منند، پاکستان ءِ سیاسی سروک زلپی بخاری ءُ آدگہ مردماں پاکستان ءِ انسانی ھکانی جاور، زوریں بیگواھی ءُ گوں میان استمان ءَ کرتگیں کول ءِ بابت ءَ وتی ھیال درشان کرتگ اَنت۔
آیاں ھمے گپ ءِ سر ءَ زور داتگ کہ پاکستان ءَ جی ایس پی پلس اسٹیٹس ءِ رد ءَ پہ تجارتی نپاں ھوار انسانی ھکانی پاسداری ءِ سر ءَ دلجمی دیگی اِنت ءُ میان استمانی زمہ واری گوں سنگینی ءَ پیلو کنگی اَنت۔
اے دیوان ءَ بلوچ نیشنل موومنٹ ءِ چیئرمین ڈاکٹر نسیم بلوچ ءَ تران کرتگ ءُ گوشتگ کہ بلوچستان ءَ پاکستان ءِ زوراکی ھمے لوٹ ءَ کن اَنت کہ یورپی یونین جی پی ایس پلس ءِ سر ءَ دلگوش بہ دنت۔ بلوچستان ءَ پاکستان ءِ زوراکیانی گر ءُ دار کنگ لوٹ اَنت کہ یورپی یونین ءَ جی پی ایس پی پلس ءِ سر ءَ دلگوش گورکنگی اِنت، چی ءَ کہ بلوچستان ءِ پہ بازیں کھولاں انسانی ھکانی سر ءَ دلگوش دیگ بھسے نہ انت بلکیں ھمے جست ءِ نام اِنت کہ آیانی زھگ زندگ اَنت یا آ داں سالاں وتی زھگاں شوھاز بہ کن اَنت۔
ڈاکٹر نسیم بلوچ ءَ گوشتگ کہ پورپی یونین ءَ پاکستان ءَ اے باپاری ءِ موہ پہ ھمے اوست ءَ داتگ کہ آ انسانی ھک ءُ جمھوریت ءِ رد ءَ سرکاری کنت ءُ میان استمانی کول ءِ پاسداری ءَ کنت۔ ایشی مول تچک اِنت کہ چہ تجارت ءِ نپاں سرکار وتی شھریانی بنکی ھک ءُ شرپ ءِ ھیال ءَ دار اَنت۔ بلے چہ بدبھتی ءَ پاکستان ءَ زمینی راستی بلکل دگر اَنت۔ چنچو دھک اِنت کہ بلوچستان ءِ مھلوک انسانی ھکانی لگتمالیانی دیم پہ دیمی ءَ کنگ ءَ اِنت۔ آیانی بگیری ءَ درکانوی دزگیری، زوریں بیگواھی، بندیگجاہ ءَ درکانودی کوش، آزاردھی ءُ سیاسی توار ءِ دارگ ءِ وڑیں زوراکی ھم ھوار اِنت۔
بی این ایم ءِ چیئرمین ءِ گوشگ اِنت کہ ھزارانی کچ ءَ بلوچ سیاسی کارکن، نودربر، اھوالکار ءُ لس شھری زور بیگواہ کنگ بوتگ اَنت۔ بازیں مردم چیریں آزار جاھاں بندیگ اَنت ءُ آمیدگس ءَ پیش کنگ بوگ ءَ نہ اَنت ءُ نہ آیانی بابت ءَ کھول ھال دیگ بوتگ اَنت۔ چہ آیاں بازیں مردمانی ژانگولیں لاش دگانی پھنات ءَ دزکپتگ اَنت۔
آئی ءَ گوشتگ کہ 2025 ءَ 1355 مردم زور بیگواہ کنگ ءُ 229 مردم درکانودی کشگ بوتگ۔ ھمے سال ءَ داں 20 مارچ ءَ 228 مردم زور بیگواہ کنگ ءُ 81 مردم درکانودی کشگ بوتگ۔ زور بیگواھیں زالبولانی تہ ءَ کسان سالیں جنک ھم ھوار اَنت۔ چہ دہ زالبولاں پنچ آزار دیگ ءَ پد یل کنگ بوتگ۔ یکے ءِ سر ءَ دروگیں بھتام جنگ ءُ رسانکدر ءَ پیش کنگ بوتگ۔ بلوچستان ءِ یک شھرے ءَ پَنجگُور ءَ دہ روچانی میان ءَ 21 مردم کشگ بوتگ۔
ڈاکٹر نسیم بلوچ ءَ گوشتگ کہ بلوچستان ءَ بازیں کھولاں چہ سالاں وتی زور بیگواھیں آزیزانی اکس گون اَنت ءُ ھمے جست ءَ کنگ ءَ اَنت کہ مئے زھگ زندگ اَنت یا کشگ بوتگ اَنت۔ آیانی ماس، گھار ءُ زھگ پہ وتی آزیزانی آجوئی ءَ گوں پر ایمنی ءَ زھرشانی کنگ ءَ اَنت۔ بازیں مردماں سدانی کچ ءَ کلومیٹر ءَ پند بُر اتگ ءُ اسلام آباد ءَ شتگ اَنت مئے توار گوش دارگ بیت۔ اے درسیں گامگیج انسانی ھکانی تچکیں بگیری اَنت۔
آئی ءَ گوشتگ کہ پاکستان ءَ سیاسی ایرادگری ءُ شھریانی آجوئی ءِ ھچ وڑیں گنجاھشت پشت نہ کپتگ جاور یکشل ءَ گنتر بوان اَنت۔ پاکستان ءِ پیشگیں مزن وزیر امران ھان دزگیر کنگ بوتگ ءُ گوں آئی ھما وڑ پیش بوگ ءَ اَنت کہ اے پہ جمھوری واکداری ءَ بازیں جست ودی کنت۔
بنشون: درشان اکس: بی این ایم