شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز ءِ زھرشانی گدان ءَ 6114 روچ سرجم بوتگ کہ گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ جتائیں بھرگاں سیادی داروکیں مردم زھرشانی گدان ءَ اتکگ اَنت ءُ گوں زوربیگواھیں مردمانی کھولاں ھمدردی درشان کرتگ ءُ زوریں بیگواھی ءِ درچ ءِ ھلاس کنگ ءُ درسیں مردمانی آجوئی ءِ لوٹ کرتگ۔
گل ءِ چیرمین نسراللہ بلوچ ءَ تران کرتگ ءُ گوشتگ کہ زوریں بیگواھی ڈیھ ءِ کانود ءُ انسانی ھکانی گنتریں لگتمالی اِنت ءُ اے وھد ءَ مستریں انسانی جیڑہ اِنت۔ بلوچستان ءَ ھزارانی کچ ءَ مردم بیگواہ اَنت کہ چہ ایشی ءَ ھزارانی کچ ءَ کھول جنجالانی دیمپان اِنت۔ گوں وتی آزیزانی جتائی ءِ درداں زند گوازینگ ءَ اَنت۔
آئی گوشتگ کہ زوریں بیگواھی ءُ درکانودی گامگیجانی سوب ءَ مھلوک ترس آماچ اِنت ءُ ریاست ءُ ریاستی ادارھانی بگیری ءَ دلسیاہ اِنت، اے پہ پاکستان ءَ نیکیں پالے نہ اِنت۔
آئی گوشتگ گوں سرکار ءُ ریاستی ادارھانی سروکاں لوٹ کرتگ کہ اے جیڑہ ءِ سر ءَ گوں سنگینی ءَ دلگوش بہ دئے اَنت ءُ ایشی انسانی ھمدردی ءِ بنیاد ءَ گیش ءُ گیوار بہ کن اَنت۔ بیگواھیں مردمانی آجوئی ءَ دلجمی بہ دئے اَنت۔ زوریں بیگواھی ءُ درکانودی کوش ھلاس کنگ بہ بیت ءُ اے جیڑہ ءِ گیش ءُ گیوار کنگ ءَ انسانی بنیاد ءُ ڈیھ کانود ءِ رد ءَ گامگیج زورگ بہ بیت۔
نسراللہ بلوچ ءَ گوشتگ کہ زوریں بیگواھی ءُ درکانودی کوشانی بگیری ءُ پہ بیگواھیں مردمانی آجوئی ءَ مئے پرایمنیں جھد برجاہ بیت۔
بنشون: درشان اکس: وی بی ایم پی
