بلوچ نیشنل موومنٹ ءِ انسانی ھکانی ادارہ پانک ءَ ممتاز بلوچ ء دلبود ءِ زوریں بیگواھی ایر جتگ ءُ گوشتگ کہ آ بلوچستان یونیورسٹی ءِ بلوچی لبزانک ءِ نودربرے۔ 18 مارچ 2026 ءَ کیچ ءِ ھند تربت، چہ آپسر ءَ پاکستانی پوج ءَ آوار جتگ ءُ بیگواہ کرتگ۔ انگت ءَ آئی ھچ وڑیں ھال نیست۔
پانک ءِ گوشگ اِنت کہ ممتاز بلوچ آواران ءِ ھند گیشکور زیک ءِ جاہ منند اِنت۔ آئی زوریں بیگواھی بلوچستان ءَ برجاھیں زوراکیاں پیش دار ایت کہ اود ءَ نودربر، دانشور ءُ لس شھری آوار جنگ ءُ بیگواہ کنگ بوگ ءَ اَنت۔
آئی گوں پاکستان سرکار ءَ لوٹ کرتگ کہ ممتاز بلوچ ءِ بابت ءَ زوت سرپدی دیگ بہ بیت ءُ پہ سلامتی یل کنگ بہ بیت، اگاں آئی سر ءَ چونیں ھم بھتامے ھست گڑا آمیدگس ءَ پیش کنگ بہ بیت۔ بلوچستان ءَ زوریں بیگواھی بند کنگ بہ بیت ءُ اے درکانودی کارانی زمہ وار جست گرگ بہ بیت۔
پانک ءَ گوں میان استمانی انسانی ھکانی گلاں لوٹ کرتگ کہ آ اے جیڑہ ءِ سر ءَ دلگوش گور بہ کن اَنت ءُ پاکستان ریاست ءَ پہ انسانی ھکانی پھریزگ ءَ زور بہ دے اَنت۔
آئی ءَ گوشتگ کہ اے وڑیں ویلانی سر ءَ یکشل ءَ بے تواری میارباراں کمک کنت بلکیں بلوچستان ءَ انسانی ھکانی لگتمالی گیش بیت۔
پانک ءَ گوشتگ کہ ھمے کول ءَ کن ایں اے وڑیں کیساں یکجاہ کن این ءُ پہ سانمندیں کھولاں جھد ءَ برجاہ دار ایں۔
بنشون: درشان اکس: پانک
