بلوچ نیشنل موومنٹ (بی این ایم) ءَ وتی درشانے ءَ گوشتگ کہ بی این ایم ءِ نیمگ ءَ برجاھیں ماھی مھم ءِ رد ءَ بی این ایم زرباری کوریا چیپٹر ءَ کوریا ءِ شھر بوسان ءَ بلوچستان ءَ پاکستانی ریاستی پوج ءِ برجاھیں انسانی ھکانی لگتمالیانی بگیری ءَ پُرایمنیں زھرشانی کرتگ۔
آئی گوشتگ کہ اے زھرشانی بیگاہ ءِ پنچ ءَ بندات بوتگ ءُ داں شش ءَ ساسانگ اسٹیشن ءِ نزیک ءَ ایپل آؤٹ لیٹ ءِ دیم ءَ برجاہ بوتگ۔ زھرشانی ءَ ھواریں مردماں زوربیگواھیانی، درکانودی کوش، آزاردھی ءُ بلوچ شھری، کارکن ءُ آیانی کھولانی بگیری ءَ مچی سزا، ریاستی زوراکی جھان ءِ دیم ءَ پاشک کرتگ اَنت۔
آئی ءَ گوشتگ کہ اے زھرشانی بی این ایم ءِ دہ مارچ ءَ داں نھ اپریل ءَ برجاھیں میان استمانی تک ءِ سرپدی مھم ءِ بھرے۔ ایشی بنیاد ءَ جتائیں ڈیھاں زھرشانی ءُ سپارتی سرگرمیاں برجاہ دارگ ءَ ایں۔ دانکہ بلوچ راج ءِ توار جھان سر کنگ بہ بیت۔ زھرشانی ءَ انگریزی ءُ کوریائی زبان ءَ پنتانک بھر ءُ بانگ کرتگ کہ آیانی تہ ءَ بلوچستان ءَ انسانی ھکانی لگتمالی ءِ گنتریں دروشم پیش داشتگ۔ ایشی ءَ بی این ایم ءِ انسانی ھکانی ادارہ پانک ءَ ھوار جتائیں رپورٹ ھوار اَنت۔
آئی گوشتگ کہ اے رپورٹانی رد ءَ پروری 2026 ءَ 109 زوریں بیگواھی ءُ پنجاہ درکانودی کوش، جنوری 2026 ءَ 82 زوریں بیگواھی ءُ دوازدہ درکانودی کوش ءُ مارچ ءِ بندات ءَ مشکے ءُ پَنجگُور ءَ مردمانی درکانودی کوش ءُ لھتین ءِ زوریں بیگواھی ھوار اَنت۔
زھرشانی ءَ بھر زرتگیں مردماں انگریزی ءُ کوریائی زباناں تران کرتگ۔ یاسین بلوچ، ھپسہ بلوچ، آگا پیز ءُ بکتاور بلوچ ءَ تران کرتگ ءُ پاکستان ءِ پوجی کاروائی ایر جتگ اَنت ءُ بلوچستان یک ٹوھیں زندانے لیک اِتگ کہ اود ءَ شھریاں ابید چہ بھتام ءَ دزگیر کن اَنت ءُ چیریں بندیگجاھاں آزار دیگ ءَ پد کشگ بنت۔
تران کنوکاں گوشتگ کہ اے گامگیج جھانی کانود ءِ رد ءَ سکا ٹوھیں میارے، اے انسانیت ءِ بگیری ءَ میارباری یے۔ ما گوں اکوام متھدہ ءُ جھانی تک ءَ لوٹ کن ایں کہ آ ایشی گر ءُ دار ءَ بہ کنت۔
آئی گوشتگ کہ بوسان ءَ مرچی بوتگیں زھرشانی بلوچستان ءِ مھلوک ءُ گوں زوراکی ءِ آماچیں کھولاں یکجھتی کنگ اِنت۔ بی این ایم، اے کول ءَ کنت کہ اے میان استمانی مھم داں ھما وھد ءَ برجاہ بیت دانکہ زوریں بیگواھی ھلاس کنگ نہ بیت ءُ دانکہ ایشی زمہ وار جست گرگ نہ بنت ءُ بلوچ مھلوک ءَ شرپ، آجوئی ءُ بنیادی انسانی ھک دیگ نہ بنت۔
بنشون: درشان اکس: بی این ایم
