بلوچ یکجھتی کمیٹی ( بی وائی سی ) ءَ وتی شنگ کرتگیں درشانے ءَ گوشتگ کہ درسیں ریاستی ادارہ اے زوراکیاں شریدار اَنت۔ اگاں رسانکدر بہ بیت، آمیدگس یا آدگہ سرکاری ادارہ ھریکے اے ناھکی ءِ برجاہ دارگءَ وتی کرد ءَ پیلو کنگ ءَ اِنت۔
آئیءَ گوشتگ کہ ریاستی سانکدری چینل جھان ءِ دیم ءَ دروگیں گپ شنگ کنگ ءَ اَنتءُ نزوریانی راستی ءَ چیر ترینگءَ اَنت۔ ھمے رسانکدری اینکر وتی وتگڑیں ھالکاریءَ پہ پوجی جرنیلانی اشارہ ءَ پیلو کنگ ءَ اَنت۔ ریاستی ادارھانی نیمگ ءَ نبشتگیں نبشتانکاں ابید ھورتچاری ءَ شنگ کن اَنت ءُ ھمے وڑ ءَ ریاست وتی زوراکیاں گیش کنت۔ رسانکدر ءِ مول راستی ءِ دیم ءَ آرگ اِنتءُ نزور ءِ توار جوڑ بوگ اِنت، بلے بلوچستانءَ بلکل اے وڑ نہ اِنت۔
آئی ءَ گوشتگ کہ دومی نیمگءَ آمیدگس ءِ کرد ءِ سرءَ چمشانک دیگ بہ بیت گڑا ھچ گندگ نہ بیت۔ اے ادارہ انساپ دیگ ءَ سرجم ءَ بے سوب بوتگ۔ انساپ دیگ ءَ ابید ھمے آمیدگس زوراک ءِ میارباریانی کانودی پھازداری ءَ کنگ ءَ اِنت۔
آئی ءَ گوشتگ کہ بی وائی سی ءِ سروکاں یک سالے بیت کہ درکانودی بندیگ اَنت۔ درسیں ادارہ ھمے درکانودی ءُ ناھکیں دزگیری ءَ بے تواری ءَ ندارگ کنگ ءَ اَنت۔ نہ رسانکدر گپ جنت ءُ نہ آمیدگس، کسے ھم اے زوراکیانی بگیری ءَ توار چست کنگ ءَ جاڑیگ نہ اِنت۔
آئی ءَ گوشتگ کہ بی وائی سی گوں بلوچ راج ءَ لوٹ کنت آ توار چست بہ کنت ءُ پہ سروکانی زوتیں آجوئی ءَ لوٹ بہ کنت، وھدے کہ آمیدگس بے توار بہ بیت گڑا مھلوک ءَ توار چست کنگ لوٹ ایت۔
بنشون: درشان اکس: مونوگرام
