بلوچ یکجھتی کمیٹی ءَ وتی درشانے ءَ گوشتگ کہ بی وائی سی ءَ ماھی برجاھیں مھم ءِ درچ ءَ کراچی ءَ یک دیوانے برجم داشتگ۔ ایشی مول برجاھیں انسانی ھکانی لگتمالی ءُ بی وائی سی ءِ سروکانی ناھکیں بندیگ کنگ ءِ دیم ءَ آرگ بوتگ۔
آئی ءَ گوشتگ کہ اے مھم توار چست کنوکانی یکشل ءَ نشانگ کنگ، جمھوری سرگرمیانی دارگ ءُ کانود ءِ رد کارگرگ ءُ بلوچستان ءَ برجاھیں زوراکیانی پژدر ءَ بندات کنگ بوتگ۔ ایشی مول پہ سانمندیں کھولاں توار چست کنگ،مردمانی سرپد کنگ، انساپ ءُ پہ بنکی ھکاں ھواریں گامگیجے ءِ زورگ بوتگ۔
دیوان ءَ بھر زرتگیں مردماں ھمے راستیانی سر ءَ گپ جتگ کہ آ مان آرگ نہ بوتگ اَنت۔ آیاں سیاسی سرگرمیانی سر ءَ گپ جتگ ءُ ھمے زوراکی پیش داشتگ اَنت کہ بی وائی سی ءِ سروکانی دزگیری ءَ سالے سرجم بوتگ۔
آیاں گوشتگ کہ ڈاکٹر ماہ رنگ بلوچ، سبگت اللہ شاہ جی، گلزادی بلوچ ءُ بیبو بلوچ ءَ ھوار آدگہ سروکاں بازیں وھدے بیت کہ درکانودی بندیگ اَنت ءُ جنجالانی دیمپان اَنت۔ چی ءَ کہ آیاں گوں پر ایمنی ءَ آئین ءِ رد ءَ پہ انسانی ھکاں توار چست کرتگ۔
بنشون: درشان. اکس: بی وائی سی
