جاؤ ءَ پاکستانی پوج ءِ دست ءَ زور بیگواھیں پیرجان، لال ء پیرجان ءُ ساد اللہ ء پیرجان ءِ کھول ءَ چہ سرکار ءَ پہ آیانی آجوئی ءَ لوٹ کرتگ۔
کھول ءِ گوشگ اِنت کہ پیرجان ء کھورو، آئی زھگ ساد اللہ ءُ لال جان ءَ پاکستانی پوج ءَ 17 پروری 2026 ءَ آوار جتگ ءُ بیگواہ کرتگ۔ آیانی زوریں بیگواھی ءَ ماھے سرجم بوگ ءَ اِنت انگت ءَ آیانی ھچ وڑیں ھال نیست۔
آئی گوشگ اِنت کہ پیرجان ءُ آئی دوئیں زھگ زمینداری کنگ ءُ وتی کھول ءَ والینگ ءَ بوتگ اَنت۔ آیاں گوں ھچ وڑیں درکانودی چست ءُ ایراں کار نہ بوتگ۔ سئیں مردم رمزان ءَ یک روچے پیش آوار جنگ ءُ بیگواہ کنگ بوتگ اَنت۔ چہ پیرجان ءُ زھگانی زوریں بیگواھی ءَ مئے کھول سکا جنجال اِنت۔
کھول ءَ گوں سرکار ءَ لوٹ کرتگ کہ پہ پیرجان، لال جان ءُ ساداللہ ءِ آجوئی ءَ زوت گامگیج بزور ایت۔ اگاں آیانی سر ءَ چونیں ھم بھتامے ھست گڑا دیم ءَ آرگ ءُ کانود ءِ رد ءَ وتی بے میاری پیش کنگ ءِ ھک دیگ بہ بیت۔
آئی ءَ گوں بلوچ راج ءُ انسانی ھکانی ادارھاں پہ پیرجان ءُ زھگانی آجوئی ءَ توار چست کنگ ءِ لوٹ کرتگ۔
بنشون: درشان اکس: اھولکار
