شال: بیگواھیں بلوچانی توار ( وی بی ایم پی ) ءِ سرکماش نسراللہ ءَ گوشتگ کہ گوستگیں روچ ءَ ھوشاپ ءُ تجابان کیچ ءَ بلوچ نودربر اسلم ء کریم بکش، ھمل ء کادر بکش ءُ بھادر ء چاکر ءَ پاکستانی لشکر ءَ درکانودی آوار جتگ ءُ بیگواہ کرتگ۔
آئی ءَ گوشتگ کہ بلوچ نودربرانی کھول پہ آیانی آجوئی ءَ سی پیک دگ ءَ چہ شمبے ءِ روچ ءَ زھرشانی ءَ نشتگ اَنت۔ نندانک ءَ جنین ءُ زھگ بازیں کچے ءَ ھوار اَنت۔ انگت ءَ چہ واکدارانی نیمگ ءَ آیانی کھولاں ھچ وڑیں سرپدی دیگ نہ بوتگ اے سکا بژنی گپے۔
نسراللہ ءَ گوں سرکار ءَ لوٹ کرتگ ءُ گوشتگ کہ بلوچ نودربرانی سر ءَ چونیں بھتام ھست آیاں دیم ءَ بیار ءُ آمیدگس ءَ پیش بہ کن۔ اگاں آ بے میار اَنت گڑا زوت یل کنگ بہ بنت ءُ آیانک کھول چہ گرانیں رنجاں آجو کنگ بنت۔
