بلوچ اسٹوڈنٹس آرگنائزیشن (بی ایس او) ءَ وتی درشان ءَ گوشتگ کہ ھشت مارچ میان استمانی روچ ءِ درگت ءَ ما سرجمیں جھان ءِ نزور ءُ لٹ ءُ پل ءِ آماچیں زالبول، بزاں بلوچ زالبولاں آیانی گوستانکی جھد، بے مٹیں دیمونی ءُ مھکمیں توکل ءَ دروت ندر کن ایں۔ بلوچ زالبولاں زورگپتیں توانمند ءُ زالبول دژمنیں سرمایہ داری ءُ زورگری نزام ءِ بگیری ءَ گھگیری ءِ یک گوستانکے زندگ داشتگ ءُ زوراکی، ناھکی ءُ ایردستی نزام نہ من اتگ ءُ پہ آجوئی، شرپ ءُ برابری ءِ چاگردے ءِ جوڑشت ءَ وتی جھد برجاہ داشتگ۔
جارکش ءَ گوشتگ کہ انسانی گوستانک شاید اِنت زالبولاں پہ چاگرد ءِ جوڑشت، مچی زندگی ءَ مھکمی گوں ابرم ءَ ھمگرنچی ءِ برجاہ دارگ ءَ بنیادی کرد پیلو کرتگ۔ ھمے آشوبی ءُ ساچشتی شری اِنت کہ آیاں زوراکیں سرکار بھرگانی ارشاں نشانگ کن اَنت۔ ھمے درچ ءَ بازیں بلوچ زالبول کشگ بوتگ، درزنانی کچ ءَ زور بیگواہ کنگ بوتگ، بلوچ یکجھتی کمیٹی ءِ سروک ڈاکٹر ماہ رنگ بلوچ، بیبو بلوچ ءُ گلزادی بلوچ درکانودی بندیگ کنگ بوتگ اَنت۔
آئی ءَ گوشتگ کہ بی ایس او بلوچ زالبولانی بگیری ءَ برجاھیں ریاستی زوراکی، زوریں بیگواھی ءُ درکانودی دزگیریاں گوں ترندیں دانکاں ایر جنت ءُ ھمے لوٹ ءَ کنت کہ درسیں بلوچ زالبول زوت ءُ پہ سلامتی یل کنگ بہ بنت ءُ ڈاکٹر ماہ رنگ بلوچ، بیبو بلوچ ءُ گلزادی بلوچ ءَ ھوار درسیں بندیگیں زالبول زوت یل کنگ بہ بنت۔
بی ایس او ھمے اوست ءَ دار ایت کہ بلوچ زالبول ءِ آجوئی، برابری ءُ راجی شرپ ءِ جھد ھمک پڑا برجاہ بیت ءُ آ روچ دور نہ اِنت کہ بلوچ زالبول ءُ بلوچ راج زوراکی ءُ لٹ ءُ پل ءِ نزام ءَ پروش بدے اَنت ءُ یک آجو، شرپ ءُ انساپ ءِ چاگردے ءِ بنیاد ءَ ایر بہ کن اَنت۔
بنشون: درشان اکس: مونوگرام
