کیپ: یوکرین ءِ مھتر ولادیمیر زیلنسکی گْوشتگ کہ مارا کس پروش دات نہ کنت،یوکرین ءِ مردم روسی لشکر ءِ دیم پہ دیمی ءَ کنگ ءَ اَنت۔ گوں یورپی پارلیمنٹ ءَ تامُربندی ءَ تران کنان ءَ یوکرین ءِ مھتر ولادیمیر زیلنسکی گْوشتگ کہ یورپی یونین وت ءَ پیش بہ دار ایت کہ گوں ما ھمراہ اِنت ءُ آئی چہ یورپی یونین ءَ لوٹ کُرتگ یوکرین ءَ یورپی یونین ءِ باسک بہ کن اِت۔ یوکرینی مھتر ءَ گْوشتگ کہ روسی اُرشاں داں انیں 16 زھگ مُرتگ،ایمنی ءِ گپ ءُ تران کنگ ءَ پیش روس جنگ ءَ بند بہ کنت۔ مھتر زیلنسکی گوں امریکا ءِ مھتر جوبائیڈن ءَ ٹیلپون ءَ داں 30 دمان ءَ یوکرین ءِ نوکتریں جاور ءُ دیمتر ءِ گامگیج ءِ بابت ءَ گپ ءِ تران کُرتگ۔ روسی اُرشاں ابید یوکرین ءِ مھتر ولادیمیرزیلنسکی کیپ ءَ ساڑی اِنت ءُ گوں جھانی سروکاں رھوت کنگ ءَ اِنت۔امریکا ءَ یوکرینی مھتر پہ دراھگ ءَ گْوشتگ اَت بلے آئی رد کُرتگ اَت۔
بنشون: جھانی رسانکدر /اکس: دامگ
