بلوچ لبریشن آرمی ( بی ایل اے ) ءِ جارکش جیئند بلوچ ءَ وتی درشان ءَ گوشتگ کہ بی ایل اے ءِ سرمچاراں کولواہ، مستونگ، سوراب، سامی، نوانو ءُ دشت ءَ چاردہ جتائیں کاروائیانی میان ءَ زورگریں پوج، جھلی لشکر ءُ کشندہ ٹولی نشانگ کرتگ۔ اے ارشاں زورگریں پوج ءِ چاردہ کارمند کشتگ، جتائیں پولیس تانہ دستیگ کرتگ ءُ کارمند دزگیر کرتگ اَنت۔ اے ارشانی میان ءَ شھدگ بستگ اَنت ءُ گاڑی پٹ ءُ پول کرتگ اَنت۔
آئی ءَ گوشتگ کہ 16 پروری ءَ کولواہ ءِ ھند بلور ءَ زورگریں پوج ءِ پیادگیں کارمند ءُ گاڑیانی کاروان ءِ سر ءَ ھما وھد ءَ ارش کرتگ کہ آ ھمے ھند ءَ لشکرکشی ءِ جھد ءَ بوتگ۔ ارش ءِ آسر ءَ یک کارمندے جاھی مرتگ ءُ دو سکا ٹپی بوتگ۔
جارکش ءَ گوشتگ کہ 24 پروری ءَ مستونگ ءِ ھند گرگینہ ءَ بی ایل اے ءِ سرمچاراں شپ ءَ لشکرکشی کنوکیں زورگریں پوج ءِ سر ءَ سنگر گپتگ ءُ ارش کرتگ۔ایشی آسر ءَ دژمن پدکنزگ ءَ لاچار بوتگ۔ دومی روچ ءَ لشکرکشی ءِ جھد کنگ ءَ یکبرے پد ءَ نشانگ کرتگ۔ اے دوئیں میڑاں زورگریں پوج ءِ چار کارمند مرتگ ءُ کم چہ کم ھپت ٹپی بوتگ۔
آئی ءَ گوشتگ کہ 26 پروری ءَ سوراب ءَ شال کرچی شھدگ داں باز اداراں بستگ ءُ پٹ ءُ پول کرتگ۔ اے میان ءَ سی ٹی ڈی ءَ دزمانجنی ءِ کوشست کرتگ، سرمچاراں سی ٹی ڈی ءِ بکتربند گاڑی گوں چیرکرتگیں شورھاں نشانگ کرتگ۔ تراک ءِ آسر ءَ گاڑی تباہ بوتگ ءُ یک کارمندے مرتگ۔
جارکش ءَ گوشتگ کہ ھمے روچ ءَ تربت ھند کلاتک ءَ پولیس تانہ دستیگ کرتگ۔ سرمچاراں سلاہ ءُ آدگہ پوجی سامانانی زورگ ءَ پد تانہ ءِ سرویلنس ٹاور گوں تراک ءَ تباہ کرتگ۔ ھمے کاروائی ءِ میان ءَ داں دو ادار ءَ دگ بستگ۔ زورگریں پوج ءَ گوں بکتربند گاڑیاں دیم ءَ آھگ ءِ جھد کرتگ سرمچاراں گوں ترندیں ارش ءَ پد کنز کرتگ۔
آئی ءَ گوشتگ کہ یک مارچ ءَ مستونگ ءِ ھند کردگاپ ءَ لشکرکشی کنوکیں زورگریں پوج نشانگ کرتگ، ایشی آسر ءَ دژمن ءَ بازیں کچے ءَ جانی ءُ مالی تاوان بوتگ۔ ھمے روچ ءَ بلیدہ ءِ ھند نوانو ءَ زورگریں پوج ءِ کاروان گوں بمب ءَ نشانگ کرتگ، ایشی آسر ءَ دژمن ءَ تاوان بوتگ۔
جارکش ءَ گوشتگ کہ 3 مارچ ءَ تربت ءِ نزیکیں ھند نودز ءَ شھدگ داں دو ادار ءَ گیش بستگ۔ ھمے میان ءَ زورگریں پوج ءَ کشندہ ٹولی ءِ ھمراھی ءَ کاروان ءِ دروشم ءَ دزمانجنی کنگ ءِ کوشست کرتگ، آ سرمچاراں تچک ءَ نشانگ کرتگ۔ ارش ءَ دو موٹر سائیکلاں ھوار دژمن ءِ بکتربند گاڑی سکا تاوان بوتگ، سے کارمند جاھی مرتگ۔ ھمے شپ ءَ تُربَت ءِ ھند ناسر آباد ءَ گوں نوکیں سلاہ ءُ تھرمل اسکوپ ءَ اسپیشل ٹیکٹیکل آپریشن اسکواڈ ءِ سرمچاراں زورگریں پوج ءِ کاروان ءِ سر ءَ سنگر گپتگ ءُ ارش کرتگ۔ ارش ءَ بکتربند ءَ ھوار سے گاڑی نشانگ کرتگ، ایشی آسر ءَ پنچ کارمند مرتگ ءُ باز ٹپی بوتگ۔
آئی گوشتگ کہ ھمے روچ ءَ کیچ ءِ ھند سامی گلگ ءَ زورگریں پوج ءِ چوکی ءِ سر ءَ باز گولا آس داتگ کہ آ گوں سوبمندی ءَ وتی نشانگ ءَ کپتگ اَنت، چہ ایشی ءَ دژمن ءَ جانی ءُ مالی تاوان بوتگ۔
جارکش ءَ گوشتگ کہ 4 مارچ ءَ سامی ءِ ھند ھپتاری ءَ سی پیک دگ ءَ پاکستانی پوج ءِ کاروان ءَ ھواریں یک گاڑی یے گوں بمب ءَ نشانگ کرتگ، ایشی آسر ءَ باز کارمند مرتگ ءُ ٹپی بوتگ۔ ھمے روچ ءَ دشت کڈان ءَ پوج ءِ یک چوکی یے ءِ سر ءَ گوں مزنیں سلاھاں ارش کرتگ ءُ تاوان داتگ۔ چہ ایشی ءَ ابید تربت شھر ءَ تالیمی چاراہ ءَ برجاھیں چوکی ءُ پسنی شھر ءَ کسٹم ءِ کارگس ءَ دستی بمب ارش کرتگ ءُ تاوان داتگ۔
جیئند بلوچ ءَ درشان ءِ گڈی ءَ گوشتگ کہ بی ایل اے تچک کنت کہ زورگریں پوج ءُ آئی پوجی ءُ مالی نپ گل ءِ تچک ءَ نشانگ ءَ اَنت۔ مئے کاروائی ھمے دیمپانی شوربندیانی درچ اِنت، ایشی مول بلوچستان ءَ پاکستان ءِ وتگڑیں زورگپتی ءِ سرجم ءَ ھلاسی اِنت۔ دژمن ءِ پوجی شوربندی، آئی ھندی کمکار ءُ لٹ ءُ پلی شوربندیانی سر ءَ ارشاں یکشل ءَ تیز کن ایں۔ بی ایل اے وتی راجی زمہ واریاں شریں وڑے ءَ سرپد اِنت ءُ داں بلوچستان ءِ سرجم ءَ آجوئی ءَ سلاہ بندیں گھگیری ءِ اے درچ برجاہ بیت۔
بنشون: درشان. اکس: زرمبش
