بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی درشان ءَ گوشتگ کہ بی ایل ایپ ءِ سرمچاراں 4 مارچ 2026 ءَ ھزدار ءِ شھر کرک ءَ یک مزنیں آپریشنے کرتگ۔ اے آپریشن ءِ مول زورگریں ریاست ءِ وتگڑیں واکداری پاشک کرتگ ءُ زورگپتیں بلوچستان ءِ شھراں بی ایل ایپ ءِ سرمچارانی پوجی دزرس ءِ مھکمی بوتگ۔
آئی ءَ گوشتگ کہ سرمچارانی یک ٹولی یے ءَ 4 مارچ ءِ سھب ءَ یازدہ ءُ نیم ءَ کرک شھر چاریں نیمگاں انگر کرتگ، درسیں راہ بستگ اَنت۔ اے آپریشن ءِ بنداتی بھر ءَ سرمچاراں ھزدار ءِ ھند رتو ڈیرو ءَ سی پیک ءَ مولہ دوارھی ءَ پولیس ءِ چوکی ءِ سر ءَ ارش کرتگ ءُ دستیگ کرتگ ءُ درسیں کارمند دزگیر کرتگ اَنت، چوکی ءَ ایریں درسیں سلاہ ءُ پوجی سامان زرتگ اَنت۔ سرمچاراں مولہ دوراھی ءُ کرک دوراھی ءَ پٹ ءُ پول بندات کرتگ۔ رند ءَ پولیسانی چوکی مانداشتگ ءُ دژمن ءَ را تچک ءَ گوشتگ کہ دژمن ءِ چونیں شوربندی یے چہ بی ایل ایپ ءِ سرمچارانی دزرس ءَ دور نہ اِنت۔
جارکش ءَ گوشتگ کہ آپریشن ءِ دومی بھر ءَ سرمچار کرک شھر ءَ پترتگ اَنت ءُ پولیس تانہ، نادرا کارگس، بینک ءُ ڈی سی کارگس ءَ ھوار درسیں سرکاری انتزامیہ بنجاہ دستیگ کرتگ اَنت۔ اے کارگساں ایریں درسیں ریاستی ریکارڈ مانداشتگ اَنت ءُ اود ءَ سلاھاں ھوار درسیں پوجی ساز ءُ سامان دستیگ کرتگ اَنت۔
آئی ءَ گوشتگ کہ کرک شھر ءِ سرجم ءَ دستیگ کنگ ءِ میان ءَ سرمچاراں اود ءَ گوں مھلوک ءَ تران کرتگ ءُ آیان ءَ زرمبشت ءِ مول ءُ زورگریں ریاست ءِ بلوچ دژمنی، لٹ ءُ پلانی بابت ءَ سرپدی داتگ۔
جارکش ءَ گوشتگ کہ دگ بندی ءِ میان ءَ مئے سرمچاراں گوں بودناکی ءَ پولیس انسپکٹر انور الی برام سند ءِ جاہ منند گوں دگہ چار مردماں دزگیر کرتگ۔پٹ ءُ پول ءِ میان ءَ چہ سب انسپکٹر ءَ وتاسے ھم دستیگ کرتگ۔ دگ بندی ءِ میان ءَ یک دزگیریں کارمندے ءَ تچک ءِ جھد کرتگ گڑا پہ آئی دارگ ءَ تیرگواری کرتگ آ ٹپی بوتگ مئے سرمچاراں زوت پد ءَ دزگیر کرتگ۔ دزگیریں کارمند کڈن کنگ ءَ پد یل داتگ اَنت ءُ ٹپی بوتگیں کارمند پہ انسانیت ءِ بنیاد ءَ الاج ءَ نادراھجاہ ءَ دیم داتگ۔
آئی ءَ گوشتگ کہ راجی مڈیانی لٹ ءُ پل ءَ ھواریں ماربل ءَ روکیں دو گاڑی نشانگ کرتگ ءُ تباہ کرتگ اَنت، ڈرائیور گوں ترندی ءَ کڈن کنگ ءَ پد یل داتگ اَنت دانکہ آ دوبر دژمن ءِ ھمے پٹ ءُ پلی نزام ءِ بھر جوڑ مہ بنت۔
جارکش ءَ گوشتگ کہ نیمروچ ءِ یک ءَ زورگریں پوج ءَ چہ دور ءَ مارٹر گولا ءِ آس دیگ بندات کرتگ ءُ گوں مزنیں سلاھاں دیم ءَ آھگ ءِ جھد کرتگ، سنگر گپتگیں سرمچاراں گوں ترندیں کاروائی ءَ نشانگ کرتگ اَنت۔ دو ءِ نزیک ءَ مولہ دوراھی ءِ نزیک ءَ سرمچارانی گون ءَ میڑ ءَ پاکستانی پوج ءِ سے کارمند مرتگ ءُ باز ٹپی بوتگ، پاکستانی پوج رند ءَ پہ پد کنزگ ءَ لاچار بوتگ۔
آئی ءَ گوشتگ کہ ھمے وڑ ءَ بھلوک ءَ سرمچارانی ارش ءُ تیرگواری ءَ دژمن ءِ دو گاڑی سکا تاوان بوتگ، ایشی آسر ءَ پوج ءِ کارمنداں چہ جانی تاوان ءِ ترس ءَ وتی گاڑی ءُ سنگر یل داتگ ءُ جستگ اَنت۔
جارکش ءَ گوشتگ کہ بیگاہ ءِ شش ءَ کرک شھر ءُ کِر ءُ کشاں سرجم ءَ دستیگی برجاہ داشتگ ءُ وتی درسیں نشانگانی سربوگ ءَ سوبین بوگ ءَ پد سرمچاراں دگ بندی ھلاس کرتگ ءُ پہ سلامتی وتی مھکمیں جاھاں شتگ اَنت۔
میجر گھرام ءَ درشان ءِ گڈی ءَ گوشتگ کہ بی ایل ایپ تچک کنت کہ ھزدار، کرک ءَ بوتگیں مھکمیں ارش مئے جھد ءِ درچ اِنت، ایشی مول بلوچستان ءِ سرجمیں آجوئی اِنت۔ مئے سرمچارانی روچ ء رھمان ءَ یک شھرے ءِ دستیگ کنگ ھمے راستی ءَ پیش دار ایت کہ بلوچستان ءِ سرڈگار پہ دژمن ءَ تنگ بوتگ ءُ آئی گروناکی گوں ھاکاں ھوار اِنت۔ اے آپریشن پہ دژمن ءُ آئی کمکاراں یاتگیری کاروائی یے۔ ھمے گپ ءِ منانک اِنت کہ بلوچ راجی آجوئی زرمبشت چہ دیمپانی بھر ءَ درکپتگ، نوں سرمچاراں گوں نہ ترسی ءَ شھرانی تہ ءَ زورگریں پوج ءَ سرجم ءَ پروش دات کن اَنت۔
بنشون: درشان. اکس: زرمبش
