بلوچ وومن پورم ءَ وتی درشانے ءَ گوشتگ کہ بلوچ وومن پورم میان استمانی زالبولانی روچ ءِ درگت ءَ یک ھپتگی سرپدی مھمے بندات کنگ ءَ اِنت، ایشی مول بلوچ زالبولانی نزوری، جنجال، مھکمی ءُآیانی سیاسیءُ چاگردی جھد ءِ دیم ءَ آرگ ءَ اِنت۔
آئیءَ گوشتگ کہ بلوچستان ءِ گوستانک گھگیری، پجار ءُ پدریچ ءِ جھد ءَ ھمگرنچ اِنت۔ گوستگیں چنچو دھک اِنت کہ اد ءَ مھلوک سیاسی زبھری، مالی ناھکی، زوریں بیگواھی ءُ پوجی کاروائیانی وڑیں جیڑھانی دیمپان اِنت۔ اے جاوراں بلوچ چاگرد ءَ مزنیں درد ءُ بے پھریزی یے ءِ آماچ کرتگ ءُ اے درسیں دردانی مزنیں بارے زالبولاں زرتگ۔
آئی ءَ گوشتگ کہ سرجمیں جھان ءِ زالبول ھکءُ پہ واک ءَ گپ جن اَنت، بلے بلوچ زالبول مرچی ھم زوریں بیگواھی، آزاردھی، سیاسی زوراکیءُ مچی سزا ءِ وڑیں جاورانی دیم پہ دیمی ءَ کنگ ءَ اَنت۔ بازیں ماس، گھار ءُ جنک پہ وتی آزیزانی واتری ءَ در پہ در اَنت۔ آیانی زندگی گوں ودار، زھرشانی ءُ انساپ ءِ لوٹ ءَ گوزگ ءَ اِنت۔
آئی ءَ گوشتگ کہ بلوچ وومن پورم گوں چاگرد ءِ ھمک بھرگ ءَ نودربر، استاد، اھوالکار، دانشور، انسانی ھکانی کارکن ءُ باسمائیں شھریاں لوٹ کنت کہ آ اے مھم ءِ بھر بہ بنت ءُ بلوچ زالبولانی گون ءَ یکجھتی بہ کن اَنت۔ بے تواری ناھکیاں گیش کنت، یکجھتی اوست ءُ مٹی ءِ بنیاد جوڑ بیت۔
آئی ءَ گوشتگ کہ بیا اِت اے میان استمانی زالبولانی روچ ءَ ما تھنا پروگرام ءُ اوگام نہ جن ایں، بلکیں ھما بلوچ ماتانی توار جوڑ بہ ایں کہ آ پہ انساپ، آجوئی ءُ شرپ ءَ یکشل ءَ جھد کنگ ءَ اَنت۔
بنشون: درشان اکس: مونوگرام
