مرچی دو روچ اِنت کہ روس ءِ اُرش یوکرین ءِ سر ءَ برجاہ اِنت۔روس ءَ یوکرین ءِ زھرناکیں سلاھانی پلانٹ دستیگ کُرتگ،آدینگ ءِ سُھب ءَ یوکرین ءِ بُنجاھی شھر کیو ءَ تراک ءُ تیرگْواری ءِ توار اِش کنگ بیتگ،یوکرین ءَ روس ءِ جنگی بالی گرابی ءِ جنگ ءِ ٹاپار جتگ۔ یوکرین ءِ مھتر ولادیمیر زیلنسکی ءَ وتی درشانی ءَ گْوشتگ کہ ناشرکار یوکرین ءِ بُنجاھی شھر ءِ تہ ءَ گْوستگ اَنت ءُ ایشی ءَ ابید ڈیھ ءِ جتائیں جاھاں ءُ یوکرین ءِ رودراتکی ھارمیو ءَ تْرندیں میڑ برجاہ اِنت۔ایشی ءَ ابید یوکرین ءِ گوریچانی نیمگ ءَ اسود ءِ زِرباری اوڈیسا ءِ شھراں میڑ ءِ ھال اِنت۔ اے میان ءَ چرنوبل ءِ زھرناکیں سلاھانی بُنجل ءِ نزیک ءَ میڑے ءَ روسی لشکر سوبین بیتگ ءُ امریکا ءِ گْوشگ اِنت روسی لشکر ءَ یوکرین ءِ لھتیں لشکری دزگیر کُرتگ۔ لس مردم چہ شھراں درکپگ ءُ یوکرین ءِ روکپتی دمگ پولینڈ ءُ رومینیا ءَ لڈ ءُ بار کنگ ءَ اَنت۔ یورپی یونین، آسٹریلیا ءُ جاپان ءَ آدینگ ءِ روچ ءَ روس ءِ سر ءَ نوکتریں پابندی جتگ۔پابندیانی تہ ءَ روس ءِ بینک،شرکت ءُ گوں روسی سرکار ءَ بندوکیں میراس ھوار اَنت۔دومی نیمگ ءَ روکپتی ڈیھاں یوکرین ءِ لشکریانی کمک ءُ ساز ءُ سامان ءِ دیگ ءِ کول کُرتگ۔
بنشون: جھانی رسانکدر/اکس: دامگ
