بلوچ راجدوستیں سروک ءُ بلوچ نیشنل موومنٹ ( بی این ایم ) ءِ پیشیگیں چیئرمین ھلیل بلوچ ءَ بی این ایم ءِ سی ءُ ھشتمی سال ءِ سرجم بوگ ءِ بابت ءَ وتی شنگ کرتگیں درشانے ءَ گوشتگ کہ مرچی بلوچ نیشنل موومنٹ ءِ جوڑ بوگ ءِ روچ ءَ سی ءُ ھشت سال سرجم بوتگ۔ اے تھنا یک گوستانکے نہ اِنت بلکیں یک انچیں جھدے ءِ چیدگ اِنت کہ آ دیمونی، مھکمی ءُ راجی زانشت ءِ ماڑی اِنت۔ 1987 ءَ شھید پدا اھمد ءُ سنگتاں بلوچ نیشنل موومنٹ ءِ بنھشت پہ ھمے مول ءَ ایر کرتگ اَت، مرچی ھم شھید پدا اھمد ءِ کاروان گوں نوکیں دھک ءِ لوٹانی ھمگرنچ کنگ ءِ پالیسی ءَ شھید گلام ءَ سپاھیانی دروشم ءَ دیم ءَ جنزاں اِنت۔ چیئرمین گلام مھمد ءِ بودناکی ءُ نہ ترسیاں بی این ایم پد ءَ راجی آجوئی تچک کرتگ ءُ گوں بے ترسیں لیکہ ءَ پہ راجی منزل ءَ سر بوگ ءَ دیمونیانی گوستانکے زندگ دارگ ءَ اِنت۔ بی این ایم ءِ جوڑ بوگ ءِ روچ ھمے گپ ءَ پیش دارگ ءَ اِنت کہ بلوچ راج پہ وتی پجار، پدریچ، مڈی ءُ وتی باندات ءِ واکداری ءَ گرگ ءَ اِنت بلے اے راہ ءَ چنچو جنجالانی دیمپانی کنگ بہ بیت۔
آئی ءَ گوشتگ کہ اے سی ءُ ھشت سالانی میان ءَ بی این ایم ءَ زوراکی، پابندی، ریاستی آزاردھی، جھل ءُ برزیاں ابید وتی لیکھی ءُ سیاسی گامگیج برجاہ داشتگ۔ اے زرمبشت ءَ بلوچ راجی جیڑہ وھدی پژدر ءَ ابید یک یکشلیں راجی لوٹے آؤرتگ، مرچی گھگیری تھنا اوگام نہ اِنت، بلکیں یک زمہ وار، زانشتی ءُ راھبندی جھدے جوڑ بوتگ۔ اے سپر گوں شھیدانی ھون، زور بیگواھیں مردمانی درد ءُ ماتانی گوں بے تواریں چیھانٹاں بندوک اِنت۔
ھلیل بلوچ ءَ گوشتگ کہ مرچیگیں روچ ءَ ما ھمے اھد ءَ کن ایں کہ بلوچ نیشنل موومنٹ آجوئی، انساپ ءُ راجی شرپ ءِ جھد ءَ نہ تھنا برجاہ دار ایت بلکیں داں آھوکیں پدریچاں پشت ماں پشت ءَ سر کنت۔ گوستانک گواہ اِنت کہ ھما زرمبشتاں راھبندانی پاسداری کرتگ آ وھد ءِ مُجاں گار نہ بوتگ اَنت بلکیں زرمبشتاں راجانی تالہ مٹ کرتگ اَنت۔
