بلوچ یکجھتی کمیٹی ءِ سروک سمی دین بلوچ ءَ وتی شنگ تامربندے ءَ گوشتگ کہ بلوچستان ءَ یک دگہ ناگیگیں جاورے ودی بوگ ءَ اِنت۔ نوں بلوچ زالبولانی زوریں بیگواھی میارے لیکگ نہ بیت دودے جوڑ بوتگ۔ ھمک روچ نوکیں کیسے دیم ءَ کیت کہ زالبول چہ گساں کھولانی دیم ءَ ابید ارزی ءُ بھتام ءَ دزگیر کنگ ءَ بگر داں بیگواہ کنگ بوگ ءَ اَنت۔
سمی دین ءَ گوشتگ کہ ھما چیز ءِ بابت ءَ گمان کنگ نہ بوتگ آ نوں دودے جوڑ بوتگ۔ بلوچستان ءَ دراجکشیں وھدے بیت کہ زوریں بیگواھی برجاہ بوتگ ءُ نوں زالبول ھم نشانگ کنگ بوگ ءَ اَنت۔ آیانی تہ ءَ کسان سالیں جنک، شیرمچیں زھگانی ماس، لاپُریں زالبول ھم ھوار اَنت۔
آئی ءَ گوشتگ کہ انوں پہ گھگیری کنگ ءَ بلوچ جنین دیم ءَ گندگ بنت۔ آ کارکن مات، جنک ءُ گھار ءِ پیم ءَ اَنت۔ آیانی نشانگ کنگ انچائیں گپے نہ اِنت بلکیں اے پہ انساپ لوٹوکانی ترسینگ، مھلوک ءِ توکل ءِ پروش دیگ ءُ آیانی کھولانی سزا دیگ ءِ پہ زانت کوشستے اِنت۔
بی وائی سی ءِ سروک ءَ گوشتگ کہ پہ اے زوراکیاں بے توار بوگ شریداری یے ۔ من گوں درسیں بھرگاں سیادی داروکیں مردماں لوٹ کن آں کہ آ اے زوراکی ءِ بگیری ءَ توار چست بہ کن اَنت ءُ بی وائی سی ءِ اے مھم ءَ بھر بزور اَنت ءُ پہ درسیں بیگواھیں بلوچ زالبولانی زوتیں آجوئیءِ لوٹ ءَ بہ کن اَنت۔
