بلوچ یکجھتی کمیٹی ءِ سروک ڈاکٹر سبیہ بلوچ ءَ وتی شنگ کرتگیں تامربندے ءَ گوشتگ کہ بلوچستان ءَ زوریں بیگواھی ءِ درچ نوں تھنا داں مئے ورنا ءُ مردیناں نہ اوشتاتگ بلکیں بلوچ زالبولاں ھم سر بوتگ۔
آئی گوشتگ کہ مرچی ماس گوں کسانیں زھگاں ھوار بیگواہ کنگ بوگ ءَ اَنت ءُ پِس گوں جنکیں زھگاں ھوار بیگواہ کنگ بوگ ءَ اَنت ایشی سوب یکین اِنت کہ ما جنگ آماچیں راجے ایں ءُ اے جنگ پہ مئے راجی مڈیانی لٹ ءُ پل ءَ کنگ ءَ بوگ ءَ اِنت۔
آئی گوشتگ کہ اے جنگ مئے دست ءَ نہ اِنت دژمن لوٹ ایت کہ کئے کشگی اِنت کئے بیگواہ کنگی اِنت آ کنت۔ چار سال پیش ھم زالبول بیگواہ کنگ بوتگ اَنت ءُ ما دگانی سر ءَ توار چست کنگ ءَ بوتگ ایں۔ دژمن مدام یکیں درچ ءَ برجاہ دارگ ءَ انت دانکہ ما اے درد ءِ مارشت ءَ یل بہ کن ایں۔
آئی گوشتگ چوش کہ چہ ھب ءَ چار زالبول بیگواہ کنگ بوتگ کہ چہ بیگواہ کنگ بوتگیں زالبولاں یک زالبولے ءَ ھشت ماہ ءِ چُکے ھم ھست کہ آ زوربیگواہ کنگ بوتگ۔ اے تھنا نا انساپی یے نہ اِنت بلکیں انسانیت ءِ بگیری ءَ میارے۔
آئی گوشتگ کہ زالبولانی زوریں بیگواھی ءِ بگیری ءَ بلوچ یکجھتی کمیٹی پنچ روچی مھمے برجم دارگ ءَ اِنت کہ اے مھم ءَ بلوچ زالبولانی بیگواھی ءِ ھلاس کنگ ءُ انساپ ءِ لوٹگ ءَ آن لائن پٹیشن، زوربیگواھی ءِ آماچسیں کھول، کارکن، نودربر، نبشتہ کارانی منانکانی ھوار کنگ، شائری، نبشتہ، سازءُ نسر ھوار بنت، پرایمنیں زھرشانی دانکہ بلوچ زالبولانی درد ءُ جنجال دیم ءَ آرگ بہ بنت ءُ آیانی بابت ءَ پسھ ءِ لوٹ کنگ بہ بیت۔
