بلوچ نیشنل موومنٹ ( بی این ایم ) ءِ نیمگءَ ماں لندن ءَ شھید بانک کریمہ بلوچ ءِ شھیدی ءِ پنچمی سالروچ ءِ درگت ءَ یک مراگشے برجم دارگ بوتگ۔ اے مراگش ءَ سیاسی سروک، دانشور، انسانی ھکانی کارکن ءُ نزوریں راجانی جھگیر ساڑی بوتگ اَنت ، آیاں بلوچ راجی زرمبشت ءَ یکجھتی درشان کرتگ۔ جتائیں راجاں سندی، پشتون، کشمیری ءُ گلگ بلستستان ءِ مردماں اے مراگش ءَ بھر زرتگ کہ اے نزوریں راجانی وت ماں وت ءَ اتھاد ءِ چیدگ اِنت۔
اے مراگش ءِ چارچینی ءِ زمہ واری بی این ایم ءِ باسک ماہ گنج بلوچ ءُ درین بلوچ ءَ گوں بوتگ اَنت کہ آیاں مھمان وش اتک کرتگ اَنت۔ گوں یک دمانے ءِ بے تواری ءَ آئی زندگی، جھد ءُدیمونی یاد کنگ بوتگ اَنت۔ چہ ایشی ءَ پد بلوچ جنین تلو ءَ شتگ اَنت ءُ ستک شانی ندر کرتگ ۔ آرٹسٹ سنجی بلوچ ءِ نیمگ ءَ جوڑ کرتگیں پورٹریٹ ءِ سر ءَ پل شانگ بوتگ ءُ ڈیوا بالینگ بوتگ۔
رند ءَ یک کسانیں تامرے ءَ بانک کریمہ ءِ زندگی، جھد ءُ میراس پیش کنگ بوتگ، ایشی ءَ بانک کریمہ ءِسیاسی سپر، آئی نہ ترسیں سروکی ءُ میان استمانی تک ءَگھگیری ءِ چیدگ ءِ پارست ءَ آئی میراس دیم ء َآرگ بوتگ۔
مراگش ءَ چہ زرمبش شنگکاری ءِ نیمگ ءَ شنگ بوتگیں کتاب” کریمہ بلوچ: اسٹوڈنٹ لیڈر سے عالمی مزاحمت کی علامت تک ‘” دیمدرائی بوتگ۔ اے مراگش ءِ آسری ءَ بانک کریمہ ءِ یات ءَ جوڑ کنگ بوتگیں سوتے پیش کنگ بوتگ کہ آچہ بی ایس او آزاد ءِ رسانکدر ءِ نیمگءَ جوڑ کنگ بوتگ۔
اے مراگش ءَ بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ، بلوچ نبشتہ کار ڈاکٹر نسیر دشتی، لندن یونیورسٹی ءِ اسکالر ءُ اس او اے ایس زربازری ایشا سنٹر ءِ باسک برزین گھمر، ورلڈ سندھی کانگریس ( برتانیہ ءُ یورپ ) ءِ ڈپٹی آرگنائزر پھمیدہ ھشک ، انسانی ھکانی کارکن، نورمریم کنور، پشتون تھپز موومنٹ ( بی ٹی ایم ) ءِ جھگیربرکنہ سید ءُ کریمہ بلوچ ءِ ناکو زتک مھلب کمبر ءَ تران کرتگ۔
آیاں گوشتگ کہ شھید بانک کریمہ یک انچیں رھشونےءِ نگاہ ءَ چارگ بیت کہ آئی بلوچ جھد ءِ بنیاد مٹ کرتگ۔ آئی نوکیں پدریچ بزاں زالبولان ءَ پہ سیاست ءُ گھگیری ءَ بھر زورگ ءَ سانمند کرتگ۔
آیاں گوشتگ کہ بانک کریمہ ءِ درانڈیھ ءَ آھگ آئی زاتی پیسلہ نہ بوتگ، آئی پہ وتی مردمانی شرپ ءُ آجوئی ءَ جھد کرتگ۔
