بلوچ نیشنل موومنٹ ( بی این ایم ) ءَ وتی شنگ کرتگیں درشانے ءَ گوشتگ کہ بلوچستان زورگپتیں ڈیھے ، 27 مارچ 1948 ءَ ایشی ءِ زورگرگ ءَ پد پنجاپی ریاست (نام گپتیں اسلامی جمھوریہ پاکستان ) ءَ چہ بلوچاں آیانی درسیں شھری ھک پچ گپتگ اَنت۔ بلوچستان ءَ اے وھدی ھچ رنگیں راھبند ءُ آئین ءِ واکداری نہ گْواہ ایت۔
آئی ءَ گوشتگ کہ دری پنجاپی پوج ءَ بلوچستان ءِ سر ءَ چہ دز ءُ ٹیکانی کمک ءَ نام گپتیں نمائشی سرکارے ٹاھینتگ بلے زورگپتیں بلوچستان ءِ درسیں شور ءُ مڈیانی سر ءَ واکدار ءُ پرماندار تچک ءَ بلوچستان ءِ کورکمانڈر اِنت۔ پنجاپی پوج بلوچستان ءَ ھما پالیسی ءِ سر ءَ کار کنگ ءَ اِنت کہ برتانیا ءَ پہ زورگپتیں ھندوستان یا نام گپتیں برتانیائی ھندوستان ءِ بارہ ءَ جوڑ کرتگ اَت۔
آئی ءَ گوشتگ کہ پاکستانی پوج ءِ زور بیگواھی ءِ پالیسی یا نام گپتیں چیریں ’ آپریشن سائلنس‘ بے مھاریں ریاستی ناشرکاری جوڑ بیتگ۔ اد ءَ کس چہ ایشی ءَ پھریز نہ اِنت ، گچینی بلوچستان ءِ وانندگیں مردم ، زانشتجاھانی استاد ءُ نودربر پاکستانی پوج ءِ نشانگ ءَ اَنت۔ بلوچستان ءَ گوں بلوچ ربیدگ ، زبان ءُ راج ءَ دوستی پاکستان ءُ پاکستانی پوج ءِ نمنوگری زانگ بہ اَنت کہ آیانی ڈنڈ پاکستانی پوج ءِ گْور ءَ زور بیگواھی ءُ درآمیدگسی کوش اِنت۔
آئی ءَ گوشتگ کہ برجاھیں سال ءِ 29 مئی 2025 ءَ بسیمگ، واشک ءِ جاھمنندیں 24 سالی ئیں ماہ جبین ء گلام مسپا چہ شال ءِ سول نادْراھجاہ ءَ دزگیری ءَ پد زور بیگواہ کنگ بیتگ۔ 22 نومبر 2025 ءَ چہ ھب ءَ نسرینہ ء دلاور زور بیگواہ کنگ بیتگ کہ آ 15 سالی ئیں چکے۔ دسمبر 2025 ءَ چہ ھزدار ءِ شھر ءَ پرزانہ ء مھمد بکش زھری پولیس ءِ نام گپتیں ناشرکاری ءِ گر ءُ داری تک ( سی ٹی ڈی ) ءَ دزگیری ءَ پد زور بیگواہ کرتگ۔
آئی ءَ گوشتگ کہ بلوچستان ءَ انسانی ھکانی جاور ءِ اے ایوک ءَ جلشکے ، اد ءَ ھزاراں مردم زور بیگواہ اِنت ، ھم روچ چہ یکے ءَ گیشتر مردم زور بیگواہ کنگ ءَ پد ابید چہ راھبند ءُ آمیدگس آزارجاھاں بند کنگ بیت ، درآمیدگسی کوش پاکستانی پوج ءِ ھمروچیگیں کار اِنت۔
آئی ءَ گوشتگ کہ ما چہ انسانی ھکانی گلاں دزبندی کن ایں کہ آ پاکستان ریاست ءِ میارانی سر ءَ سنگین ءُ سانمندیں گامگیج بزور اَنت ءُ آئی ءَ میان راجی تک ءَ جست ءُ پرس ءُ گر ءُ دار بہ کن اَنت۔
