بلوچ آجوئی لوٹوکیں سروک رھیم بلوچ ایڈوکیٹ ءَ وتی شنگ کرتگیں درشانے ءَ گوشتگ کہ بلوچستان ءِ آجوئی ءُ مڈیانی سر ءَ بلوچ ءِ وتواکی ءَ ابید چونیں ھم شوربندی یے پھریز ءُ سوبمند نہ بیت۔
آئی ءَ گوشتگ کہ پہ سرڈگار ءِ دیمپانی ءَ گھگیری کنوک ءُ وتی جانانی ندر کنوک ناشرکار نہ اَنت بلکیں راجی بامرد اَنت آیاں دروت ندر کن آں۔
رھیم بلوچ ایڈوکیٹ ءَ گوشتگ کہ پاکستانی پوج ءِ بریگیڈ ھیڈ کوارٹر ءِ وڑیں مزنیں پوجی بنجلے ءِ میان ءَ کمپاؤنڈ ءِ سر ءَ بلوچ گھگیری کنوکانی ارش ءَ باز جست ودی کرتگ۔
بلوچ رھشون ءَ گوشتگ کہ میان استمانی کمپنی ءُ بلوچستان ءَ باپاری کنوکیں ڈیھ زمینی ءِ چیر ءِ چیریں سھر، چاندی، تانبہ، آسن، اشکر ءُ گیس ءَ گند اَنت بلے بلوچ سرڈگار ءِ سر ءَ زند گوزینوکیں بلوچ مھلوک ءِ ایردستی ءُ پاکستان ءِ دست ءَ چکچینی ءَ میم نہ کن اَنت۔
رھیم بلوچ ایڈوکیٹ ءَ گوشتگ کہ پہ آجوئی ءَ مڑوکیں جنگولانی اے ارش بلوچستان ءِ مڈیانی پھریزگ ءُ آجوئی جھد ءِ بابت ءَ گل ءِ شوربندیانی درچ ءَ پیش دار ایت۔ ھمے گل ءَ 2004 ءَ گْوادر ءَ ڈیپ سی پورٹ ءِ کارکنوکیں چینی انجینئرانی سر ءَ ارش کرتگ اَت، چہ ایشی ءَ گْوادر ءِ دستیگ کنگ ءُ اود ءِ جاہ منندانی مٹ کنگ ءِ چین ءُ پاکستان ءِ واب ءُ واھشت پروش داتگ اَنت۔
آئی ءَ گوشتگ کہ آجوئی لوٹانی ناشرکار گوشگ ھما گجّ اِنت کہ تُپ کنوکیں مردم ءَ مدام چٹگ لوٹ ایت۔ نیلسن منڈیلا ھم ناشرکار گوشگ بوتگ۔
رھیم بلوچ ءَ گوشتگ کہ گندگ ءَ چونیں کسے ھم بزاں زورگر آجوئی لوٹوکاں ناشرکار گوشت کنت، بلے بلوچ مھلوک ءُ من آیاں وتی بامرد سرپد بہ این ءُ آیانی نہ ترسی ءُ دیمونیاں دروت ندر کن ایں۔
