بلوچ وومن پورم ءِ بنجاھی جارکش ءَ وتی شنگ کُرتگیں درشانے ءَ گْوشتگ کہ زْرمبشت چہ بلوچستان ءَ بالاچ ءِ شھید کنگ ءَ پد تربت ءَ بندات بیتگ کہ آئی ءِ توار بلوچستان ءِ ھمک دمک، کوچگ ءُ بازاراں داں اسلام آباد ءَ ریاست ءِ ٹوھیں واکدار ءُ جھانی رسانکدر ءِ کِر ءَ سر بیتگ بلے ھما رویشت کہ ریاست ءَ گْوستگیں ھپتاد ءُ پنچ سالانی تہ ءَ برجاہ داشتگ ءُ وتی زوراکی رویشت ءِ گھتر کنگ ءَ جاڑی نہ اِنت چے ءَ کہ ریاست ءِ سیت گوں بلوچ ءَ نہ اَنت بلکیں گوں بلوچانی زمین بلوچستان ءَ اِنت۔
جارکش ءَ گْوشتگ کہ اسلام آباد ءَ گوں مئے مات ءُ گُھار ءُ زھگانی پہ زور دارگ ءِ جُھد کنگ بیتگ ءُ زوراکی ءِ نشانگ کنگ بیتگ اَنت، دُرسیں چیز جھان ءِ دیم ءَ پدر بیتگ کہ ما مدام گْوشتگ کہ بلوچ چکچین کنگ بیگ ءَ اِنت، مئے ماتانی جگر ءِ ٹُکر روچ ء رھمانی آوار جنگ ءُ سالانی سال بیگواہ کنگ ءُ درکانودی کشگ بنت کہ اے یک بلاھیں جنجالے جوڑ بیتگ ءُ ایشی ءِ یک درورے بالاچ ءِ کوش اِنت۔
جارکش ءَ وتی درشان ءِ گُڈی ءَ چہ بلوچ راج ءَ دزبندی کُرتگ ءُ گْوشتگ کہ 27 جنوری ءَ شال ءَ بیتگیں مُچی ءَ بھر بہ زور اِت چے ءَ کہ مارا ھوار بیگ ءُ ریاست ءَ اے کلوہ دیگی اِنت کہ نوں بلوچ گیشتِر تئی زور ءُ زوراکیاں اوپار نہ کنت۔
