بلوچ لبریشن آرمی (بی ایل اے) ءِ جارکش جیئند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں مستونگ ءُ پنجگور ءَ دو جتائیں کاروائیاں زورگریں پوج گوں بمب ءَ نشانگ کرتگ ءُ پوج ءِ دزگیر کرتگیں کارمندے کشتگ۔
آئی گوشتگ کہ بی ایل اے ءِ سرمچاراں مستونگ ءِ ھند مرو کنڈ ءَ زورگریں پاکستانی پوج ءِ بمب چاروکیں ٹولی ءِ پیادگیں کارمند ھما وھد ءَ گوں تراکناکیں شورھاں نشانگ کرتگ اَنت کہ آ دگ ءَ بمب چارگ ءَ بوتگ اَنت۔ تراک ءِ آسر ءَ زورگریں پوج ءِ سے کارمند جاھی مرتگ۔
جارکش ءَ گوشتگ کہ بی ایل اے ءِ سرمچاراں سے شمبے ءِ روچ ءَ پنجگور ءَ پاکستانی پوج ءِ یک کارمندے دودا ھان ء دین مھمد کہ وشبود ءِ جھمنند اِنت چہ پاردان ءَ ھما وھد ءَ دزگیر کرتگ کہ آئی وتی دروشم مٹ کرتگ ءُ پہ چاریگی ءَ تر ءُ گرد کنگ ءَ بوتگ۔
آئی گوشتگ کہ دودا ھان ءِ جست ءُ پرس ءَ میان ءَ چہ آئی ءَ زورگریں پوج ءِ سروس کارڈ ءَ ھوار ٹریکنگ چپ دزکپتگ۔ جست ءُ پرس ءِ میان ءَ آئی من اِتگ کہ آئی دیر اِنت وتی دروشم مٹ کرتگ ءُ پہ پوج ءَ چاریگی ءُ کمکاری ءَ بوتگ۔ آئی من اِتگ کہ آپہ ٹریکنگ چپ ءَ سر کنگ ءَ ھمے ھند ءَ آتکگ بلے سرمچاراں راہ ءَ دزگیر کرتگ۔
آئی گوشتگ کہ زورگریں پوج ءِ کارمند دودا ھان ءَ من اِتگ کہ آ گوں پوج ءِ ھواری ءَ لشکر کشیاں گوں بوتگ، گسانی ماندارگ ءُ ورنایانی زوربیگوھیاں ھم ھوار بوتگ۔
جارکش ءَ گوشتگ کہ بی ایل اے ءِ سرمچاراں زورگریں پوج ءِ کارمند پاردان ءَ کشتگ ءُ گڈی آسر ءَ سر کرتگ۔
