کیچ ءِ ھند دشت ءَ پاکستانی پوج ءَ ورنایے آوار جتگ ءُ آزار دیگ ءَ پد زھر داتگ ءُ کشتگ۔
اھوالکار ءِ رد ءَ کشگ بوتگیں ورنا ءِ نام اجاز ء دین مھمد اِنت کہ آ دشت کنچتی جھمنند اِنت ءُ دوشی پاکستانی پوج ءَ آئی گس ءَ بیڑ برتگ ءُ آوار جتگ۔
کھول ءِ گوشگ اِنت کہ مرچی نیمروچ ءَ مارا پوج ءَ وتی بنجل ءَ لوٹائینتگ ءُ مئے زھگ مارا داتگ کہ آ سکا ٹپی بوتگ ءُ آئی جاور ناگیگ بوتگ اَنت۔ آ پہ الاج ءَ تُربَت ءِ نادراھجاہ ءَ برتگ بلے آئی جاور گیش ناگیگ بوتگ اَنت کہ پہ گیشیں الاج ءَ کراچی ءَ برگ ءِ جھد کرتگ، بلے آئی چہ زھر وارینگ ءُ گیشیں آزارانی سوب ءَ ٹپانی درد نہ سگ اِتگ اَنت ءُ بیران بوتگ۔
چوش کہ اجاز بلوچ ءَ یکبرے پیسر ءَ ھم پاکستانی پوج ءَ آوار جتگ اَت ءُ پد ءَ یل داتگ اَت۔ اے آئی دومی رند اِنت کہ پاکستانی پوج ءَ آوار جتگ ءُ کشتگ۔
